Хүнс, хөдөө аж ахуй, хөнгөн үйлдвэрийн сайд М.Бадамсүрэн УИХ-ын гишүүн, УИХ дахь МАН-ын бүлгийн дарга Ж.Батжаргалыг өнөөдөр хүлээн авч уулзлаа.
Уулзалтад Хүнс, хөдөө аж ахуй, хөнгөн үйлдвэрийн дэд сайд Б.Нямжав болон яамны газар, хэлтсийн дарга, агентлагийн дарга нар оролцож, салбарын өнгөрсөн оны ажлын гүйцэтгэл, үр дүн болоод 2026 оны төлөвлөлт, хэрэгжилтийг хангахад анхаарах асуудлын талаар хэлэлцэв.
Энэ үеэр ХХААХҮ-ийн сайд М.Бадамсүрэн ирэх оны бодлогын чиглэл талаар, холбогдох албан тушаалтнууд Газрын тухай хууль болон Жижиг, дунд үйлдвэрлэл үйлчилгээг дэмжих тухай хуулийн нэмэлт өөрчлөлтийн төсөл зэрэг салбарын яамнаас боловсруулж буй хуулийн төсөл, ирэх хаврын тариалалтын бэлтгэл, ноос, ноолуурын салбарт тулгамдаж буй талаар танилцууллаа.
Дээрх танилцуулгуудтай холбогдуулан УИХ дахь МАН-ын бүлгийн дарга Ж.Батжаргал хуулийн төслүүдээ харилцан уялдаатай боловсруулж, үзэл баримтлалдаа мэргэжлийн газруудын саналыг тусган, хөдөө аж ахуйн салбарыг хөгжүүлэхэд түлхэц болсон эрх зүйн орчныг бүрдүүлэх нь зүйтэй. Мөн салбарын асуудлыг цогцоор харж мах экспортлогч, малчин, тэжээл үйлдвэрлэгч гэсэн гурвалсан холбоог хангаж, хамтарсан хэлбэрээр хөгжүүлэх хэрэгтэй гэв. Цаашид арьс шир боловсруулах зэрэг үйлдвэрлэлийн бодлогод анхаарч ажиллахыг онцлон тэмдэглэлээ.
ХХААХҮ-ийн сайд М.Бадамсүрэн УИХ дахь МАН-ын бүлгийн дарга Ж.Батжаргалд яаман дээр ирж ажиллан, салбарын асуудлыг сонссонд талархал илэрхийлээд салбарын шинэчлэлд улс төрийн дэмжлэг үзүүлж ажиллахыг хүслээ.
Сэтгэгдэл бичих