Үндсэн хуулийг олон нийтэд сурталчлан таниулах, эрхэмлэн дээдлэх ухамсар соёлыг төлөвшүүлэх зорилгоор УИХ-ын Тамгын газраас “Монгол Улсын Үндсэн хуулийн түүхэн баримт” үзэсгэлэнг дэлгэлээ.
Үзэсгэлэнг өнөөдөр УИХ-ын дарга Н.Учрал нээн үг хэлсэн юм. Тэрээр өдгөөгөөс 34 жилийн тэртээ манай улсын засаг захиргааны бүх нэгжийг төлөөлсөн 430 депутат эх орон, ард түмнийхээ язгуур эрх ашгийг гүнээ эрхэмлэн дээдэлж, алжаал ядралыг умартан, хоёр сарын хугацаанд оюун ухаанаа уралдуулан байж Ардчилсан шинэ Үндсэн хуулиа хэлэлцэн баталсан. Шинэ Үндсэн хуулиараа бид Монгол Улс бол ардчилсан улс болохоо, ардчиллын замаар цаашид тууштай замнахаа дэлхий ертөнцөд зарлан тунхаглаж, хүний эрх, эрх чөлөө, шударга ёс, тэгш байдал, үндэсний эв нэгдлийг эрхэмлэсэн хүмүүнлэг, иргэний, ардчилсан нийгэм байгуулахаа илэрхийлж, улс үндэстнийхээ тусгаар тогтнол, бүрэн эрхт байдлыг тамгалан баталгаажуулсан гэдгийг онцлон дурдав.
Үзэсгэлэнд Монгол Улсын Үндсэн хуулийг хэлэлцэн батлах үеийн архивын түүхэн баримтуудыг эх хувиар нь дэлгэн үзүүлсэн бөгөөд Монгол Улсын Төрийн сүлд, далбаа болон Үндсэн хуулийн төслийг боловсруулах, хэлэлцэх, батлахтай холбоотой архивын эх баримт, Үндсэн хуулийн төслийн хувилбарууд, иргэд, байгууллагаас ирүүлсэн санал, Улсын Бага Хурал, Ардын Их Хурлын чуулганы хуралдааны тэмдэглэл, эд өлгийн зүйлсийг нийтийн хүртээл болгож байна.
Эдгээр үзмэрүүд нь Үндсэн хуульт байгууллын болон Үндсэн хуулийн түүх, төрт ёс, түүхэн уламжлалыг олон нийтэд, ялангуяа хүүхэд залууст таниулах, Үндсэн хуулийг эрхэмлэн дээдлэх үзэл санааг түгээн дэлгэрүүлэхэд чухал ач холбогдолтой юм.
Сэтгэгдэл бичих