МҮИС буюу Монголын Үндэсний их сургуулийн нэр гадаад, дотоодгүй МУИС-ийнхтай андуурагдаад олон жил болсон. Тиймээс МУИС маргаан үүсгэж, тэр нь бас хэдэн он дамнасан.
Тодруулбал, 2020 оноос эхлэн МУИС, МҮИС хоёр сургуулийн нэр, бараа тэмдэгтийн маргаан гурван шатны шүүхээр орж шийдэгдсэн. 2022 онд УБЕГ-ын байцаагч МҮИС нэрийг хүчингүй болгосон. Үүнээс үүдэн МҮИС-ээс УБЕГ-ын байцаагчийг “…МҮИС нэрийг цуцалсан” гэх шалтгаанаар шүүхэд дахин нэхэмжлэх гаргасан байдаг.
Тэгж тэгж өнгөрсөн хавар Дээд шүүхийн Захиргааны хэргийн танхимаар “…МУИС-ийн оноосон нэртэй холбоотой” маргаан эцэслэн шийдвэрлэсэн. Ингэхдээ, анхан болон давж заалдах шатны шүүхийн шийдвэр, магадлалыг хүчингүй болгож, МҮИС-ийн нэхэмжлэлийн шаардлагыг бүхэлд нь хэрэгсэхгүй болгож, МУИС-ийн гомдлыг хангаж шийдвэрлэсэн.
Ингэснээр уг маргаан шүүхийн шатанд эцэслэгдэж, МУИС түүхэн нэрээ баталгаажуулан авч үлдсэн.
Гэтэл, асуудал ингээд дуусаагүй бололтой. Учир нь, МҮИС-ийн эзэд шүүхээр хориглуулсан “Үндэсний” нэрээ “Үндэстний” болгож өөрчилжээ. Үүнийгээ УБЕГ-т бүртгүүлээд баталгаажуулсан байна. “…МУИС уу, МҮИС уу” маргаан дахиад эхэлж магадгүй юм.
Эх сурвалж: polit.mn
Сэтгэгдэл бичих