Д.Батбаяр: Би төрөөс төрсөн тэрбумтан, 30 гэр бүлийн нэг биш

“Ухаалаг уул уурхай” төслийг санаачлагч Д.Батбаяраас дараах зүйлийг тодрууллаа. 

-Та “Ухаалаг уул уурхай” төслийг санаачилж ажиллаж байна. Энэ талаараа тодорхой мэдээлэл өгнө үү?

-Ухаалаг уул уурхай төслийг хэрэгжүүлж байна. Үүнийг хүмүүс хараахан сайн мэдэхгүй байж магадгүй. Монгол Улсын нийт нутаг дэвсгэрт 2019 оны байдлаар 3377 лиценз байдаг. Үүний 1644 нь “Х” лиценз юм. Өөрөөр хэлбэл, хайгуул хийх ёстой гэсэн үг. Үлдсэн нь ашиглалтын “А” лиценз байдаг. Энэхүү “А” лиценз нь цөөхөн тооны буюу 30 гэр бүлийн гэгдээд байгаа тэрбумтан, хүмүүст төвлөрсөн байдаг. Харин хайгуулын лиценз нь жирийн иргэд, залуусын гар дээр байдаг гэж ойлгож болно.

Маш хүнд нөхцөлд ажилладаг, мөнгөө төлж чадахгүйд хүрч улмаар лицензээ хураалгадаг. Гэсэн ч улсад татвараа төлөөд явдаг. Нэг хоног л татвараа хоцроовол лицензийг нь хураачихдаг. Тиймээс ийм залуус нэгдэж, надтай хамтарч “Ухаалаг уул уурхай” гэсэн төслийг эхлүүлж байгаа юм. Өнөөдөр тухайн иргэн нь лицензээ хураалгахгүйн тулд манайд ирээд хамтардаг. Харин бид өмнөөс нь мөнгийг нь төлж, маш олон хайгуулын ажил явуулдаг юм. Өөрөөр хэлбэл, бүх зардлыг нь манайх гаргаж, хайгуулаа хийж байна. Хэрэв ямар нэгэн юм олдохгүй бол хоёр талдаа хохироно. Хэрэв юм гарч ирвэл эдийн засагт бага ч гэсэн нэмэр болно, хөл дээрээ босоод ирнэ.

-Тэгвэл танд ямар ашиг байгаа юм бэ?

-Гэрээ байгуулдаг. Манай компанид лицензээ шилжүүлдэг.

-Хөрөнгө оруулалтаа хаанаас авч байна вэ?

-Япон улсаас хөрөнгө оруулалтаа татдаг. Япончууд 60 хувь, миний бие 40 хувийг нь эзэмших гэрээтэй.

-Гэхдээ таныг төрөөс төрсөн тэмбумтан, өнөө 30 гэр бүлийн нэг гэж ярьдаг. Энэ ямар учиртай юм бэ?

-Би 30 гэр бүлийн нэг биш. Төрөөс төрсөн тэрбумтан ч биш. Цэвэр хөдөлмөрөөрөө ажиллаж, бизнес хийж яваа хүн. Манай компани цаашид үйл ажиллагаагаа өргөжүүлнэ. Хөрөнгө оруулалтаа нэмнэ. Ганцаараа хүчин мөхөстөөд явахын оронд нэгдэж, ухаалаг бизнес эрхлэхийг залуустаа уриалж байна.