Хүнс, хөдөө аж ахуй, хөнгөн үйлдвэрийн яамнаас хэрэгжүүлж буй “Атрын IV аян”-ы хүрээнд хөнгөлөлттэй зээлээс 30 хувь, төсөл хэрэгжүүлэгч аж ахуйн нэгжийн 70 хувийн санхүүжилтээр “Мимо агро парк” бүрэн автомат хүчит тэжээлийн үйлдвэр ашиглалтад орж, нээлтээ хийлээ.
Өдөрт 50 тонн тэжээл үйлдвэрлэх хүчин чадалтай тус үйлдвэр нь малчид, фермерүүдийн өвөлжилтийг хөнгөвчлөх, малын ашиг шимийг нэмэгдүүлэхэд чухал ач холбогдолтой. Үйлдвэр ашиглалтад орсноор орон нутагт 25-30 ажлын байр шинээр бий болж, нэмүү өртөг шингэсэн эцсийн бүтээгдэхүүн үйлдвэрлэх нөхцөл бүрдэж байна.
“Мимо” брэнд нь монгол эрдэмтдийн 30 жилийн судалгаанд тулгуурлан 2022 онд дотоодын анхны эрдэс нэмэлт тэжээлийг үйлдвэрлэн зах зээлд нийлүүлж эхэлсэн. Монгол орны онцлог байгаль, цаг уурын нөхцөлд тохирсон хөдөө аж ахуйн шийдлийг дотоод, гадаадын эрдэмтэдтэй хамтран боловсруулж, импортыг орлох үйлдвэрлэлийг нэмэгдүүлэх чиглэлээр тууштай ажиллаж байна.
Төвийн бүсийн газар тариалангийн бүсийг түшиглэн “Мимо агро парк” төслийн бүтээн байгуулалтыг үе шаттайгаар хэрэгжүүлж байгаа бөгөөд энэхүү цогцолбор нь уур амьсгалын өөрчлөлтөд дасан зохицох, орон нутгийн эдийн засгийг дэмжих, тогтвортой ногоон хөгжлийг хангах зорилготой юм.
Төслийн хүрээнд 3500 га талбайд газар тариалан эрхлэн органик эрдсийн бордооны судалгаа, туршилт, тариалалт хийх, хөдөө аж ахуйн инноваци, судалгаа, сургалтын төв байгуулах, 250-300 хүний багтаамжтай эвент, форумын танхим, сургалтын өрөө, оффис, амралт, үйлчилгээний байгууламжийг ашиглалтанд оруулжээ. Цаашид “Мимо агро парк” нь цаашид түүхий эдийн цэвэрлэгээ, хатаалтын үйлдвэр, Ерөнхий боловсролын болон их, дээд сургуулийн сурагч, оюутнуудад зориулсан хөдөө аж ахуйн танин мэдэхүй, дадлагын иж бүрэн хөтөлбөр, органик хүлэмжийн нарийн ногооны үйлдвэрлэл, БНЭУ-ын T.Stanes компанитай хамтарсан эрдсийн бордооны үйлдвэр, сүүний болон махны чиглэлийн эрчимжсэн фермерийн дадлагын загвар аж ахуй, малчид, тариаланчид, хоршоо, үйлдвэрлэгчдийн бүтээгдэхүүнийг зах зээлд нийлүүлэх “Agro mall” худалдааны төвийг ашиглалтад оруулах юм.
Сэтгэгдэл бичих