ДЭМБ өнөөдөр олон улсын хэмжээнд эмэнд тэсвэртэй халдвар (AMR) эрчтэй өсөж буйг анхааруулж, улс орнууд улс төрийн амлалтаа бодит үйлдэл болгон хувиргахгүй бол дэлхий дахин “эмчилгээ үр дүнгүй болох үе шат руу” шилжих аюултай байгааг мэдэгдлээ. Дэлхийн AMR-ын талаарх 2025 оны уриалга, удирдамжийг нийтэлсэн ДЭМБ эмийн зохисгүй хэрэглээ, антибиотикийн хяналтгүй олголт, мал аж ахуй болон хүрээлэн буй орчин дахь эмийн үлдэгдлийн асуудал олон улсад эрүүл мэндийн тогтолцоог доройтуулах хэмжээнд хүрснийг онцолсон байна.
Тус байгууллагын мэдээлснээр, одоогоор жил бүр олон сая хүн эмэнд тэсвэртэй халдвараар өвдөж, эрт нас барах эрсдэлд орж байна. Антибиотикт тэсвэртэй сүрьеэ зэрэг халдварын тохиолдол зарим бүс нутагт тогтвортой өссөн хэвээр байгаа нь эмчилгээний зардлыг нэмэгдүүлж, эмнэлгийн ор хоногийг уртасгасаар байгаа аж. ДЭМБ-ын шинжээчид хэрэв дэлхий нийт хяналтаа сайжруулж чадахгүй бол одоо эмчлэгддэг өвчнүүд ч ирээдүйд хүндрэл дагуулсан аюултай хэлбэрт шилжихийг үгүйсгэхгүй гэж анхааруулжээ.
Энэ жилийн уриалга нь улс орнуудыг антибиотикийн хэрэглээг зөв зохицуулах, лабораторийн хяналтын чадавхыг нэмэгдүүлэх, хүн–амьтан–байгаль гурвалсан (One Health) хяналтын тогтолцоог бэхжүүлэх, эрт илрүүлгийн системийг сайжруулах, эмийн хяналттай олголтыг нэгдсэн журмаар мөрдүүлэх зэрэг бодит алхамд төвлөрөхийг онцолжээ. Мөн эмийн үйлдвэрлэлд чанарын стандартыг чанд мөрдөх, хямд төсөр боловч үр дүнтэй шинэ антибиотик, орлуулах эмчилгээний судалгааг дэмжих шаардлагатай байгааг дурдсан байна.
ДЭМБ-ын мэдэгдэлд “амлалт хангалтгүй, улс орнууд бодитоор хөрөнгө оруулалт хийж, бодлогын өөрчлөлт хийхгүй бол AMR эрүүл мэндийн дарамтыг аюулын түвшинд аваачих” болсныг тэмдэглэжээ. Тус байгууллагын тооцоолсноор, үүсээд буй нөхцөл байдал нь дэлхийн эдийн засагт ч ирэх жилүүдэд үлэмж дарамт учруулах төлөвтэй байгаа аж.
Эх сурвалц: ДЭМБ – World AMR Awareness Week 2025 urges action to turn political commitments into life-saving interventions
Сэтгэгдэл бичих