Цас орсонтой холбоотойгоор халтиргаа гулгаанаас урьдчилан сэргийлэх ажлыг нийслэлийн хэмжээнд зохион байгуулж байна. Тухайлбал, Чингэлтэй дүүрэгт зам талбайн үйлчилгээний 75 ажилтан, 15 машин, тусгай зориулалтын техниктэйгээр давс бодис цацаж, зам талбайг цэвэрлэж байна.
Энэ талаар Чингэлтэй дүүргийн менежер Л.Цэеэрэгзэнээс тодруулахад “Чингэлтэй дүүргийн хэмжээнд үүрийн 04:00 цагаас эхлэн есөн давс бодис цацах техник, дөрвөн шүүрдэгч, хоёр ковш нийт 15 машин, тусгай зориулалтын техниктэйгээр 75 ажилтан зам талбайг цэвэрлэж, давс бодис цацаж байна. Гэр хорооллын замуудад халтиргаа гулгаа үүсэх магадлалтай байгаа учраас давс, бодисын нөөцийг бүрэн хангасан. Нийслэл, дүүргийн хэмжээнд цас цэвэрлэгээний техник нэлээд шинэчлэгдсэн. Ингэснээр цасыг хурдан шуурхай, хялбараар цэвэрлэж байна. Энэ жил авто замын нуух, явган замын цэвэрлэгээг техникээр хийж байгаа онцлогтой. Дүүргүүдийн зам цэвэрлэгээг дүүргүүд өөрсдөө хариуцдаг болсон. Тиймээс аж ахуйн нэгж, байгууллагууд орчныхоо 50 метрийн газрыг цэвэрлэж хэвшихийг уриалж байна” гэв.
Чингэлтэй дүүргийн хэмжээнд хариуцсан авто зам болон явган замд халтиргаа, гулгаа үүсэхээс урьдчилан сэргийлж, Өвөр гүнт зуслан чиглэлд 10 тонн, гэр хорооллын авто замуудад 25 тонн, хотын төвөөр 10 тонн, нийт 45 тонн давс авто зам дээр цацаад байгаа аж. Дүүргийн хэмжээнд 1314 тонн давс, 1760 тонн бодис, 476 тонн дайргын үлдэгдэлтэй байна. Авто замын нөхцөл хүндэрч болзошгүй үед давс бодис цацах болон ажилчдын бэлэн байдлыг ханган ажиллаж байгааг албаны хүн онцоллоо.
Сэтгэгдэл бичих