Найман зууны тэртээ Чингис хаан “Морин дэл дээр дэлхийг эзлэх амархан, Мориноосоо буугаад улс орныг төвхнүүлэх хэцүү” хэмээн өгүүлжээ. Чингис хаан улс орны аж ахуй, ард түмний амжиргааг өөд татахад тулгарах бэрхшээл дунд дуу алдсан болов уу. ЗГХЭГ-ын дарга, залуу сайд Л.Оюун-Эрдэнэ МАНАН-тай үзэлцэхийн сацуу утаатай тэмцэнэ гэдгээ зарлалаа. Шударга ёс, баялгийн тэгш хувиарлалт нийгмийн эрэлт хэрэгцээ ч гэлээ агаарын бохирдлыг бууруулах нь нийтийн шаардлага, хүлээлт юм. Энэ нийгмийн эрэлт хэрэгцээ, нийтийн шаардлага, хүлээлтийг чих зөөлөнтэйгээрээ, мэдрэмжтэйгээ Л.Оюун-Эрдэнэ барьж авчээ.
Олон жилийн турш Агаарын бохирдлыг Засгийн газрын ч юм уу, Н.Алтанхуягийн шийдэх асуудал мэтээр ойлгож ирсэн. Улс төрийн намууд сонгууль болгоноор “Агаарын бохирдлыг бууруулна” гэж амладгаас үүдэн улс төрчдийн шийдэх асуудал хэмээн ойлголт гарчээ.
У.Хүрэлсүхийн тэргүүлсэн Засгийн газар Агаарын бохирдлыг бууруулахаар Сайжруулсан шахмал түлшний үйлдвэр байгуулжээ. Тавантолгой ордын нүүрсийг “Sootpree”, хөө тортог бууруулагч, шохойтой холин Сайжруулсан шахмал түлш хийж байгаа юм билээ. 220 мянган өрхийн түлдэг түүхий нүүрсийг (Хүхэр, фосфор, дэгдэмхий бодис гэх мэт Мендлевийн үелэх системийн 76 элемент байдаг) сайжруулсан шахмал түлш (Мендлевийн үелэх системд байх элементүүд багасгассан) хийж байгаа ажилд Л.Оюун-Эрдэнэ орж ирлээ. Тэрээр “Агаарын бохирдол ганц “Таван толгой түлш” компанийн ажил биш. Засгийн газар цаашлаад Монголчуудын хүчээ нэгтгэх үйл хэрэг” хэмээн мэдэгдэж байгаа юм. Монголчууд нэгэн зүг, хүчээ нэгтгэж байж Агаарын бохирдлыг бууруулж чадна. Далайн цунами, галт уулын дэлбэрэлт шиг давагдашгүй хүчин зүйлс биш. Агаарын бохирдол гэдэг метрополис хотуудад тулгардаг даван туулаад гардаг бэршээл л дээ.
Сэтгэгдэл бичих