Сонгинохайрхан дүүргийн 34 дүгээр хороо, Баянголын аманд 10 га талбайд хотын төвөөс 15 км зайтай 2007 айлын орон сууцны хороолол барьж байна. Өнөөдөр төслийн талбайд нийслэлийн Засаг дарга бөгөөд Улаанбаатар хотын Захирагч Х.Нямбаатар, НЗД-ын нэгдүгээр орлогч Т.Даваадалай болон холбогдох албаныхан ажиллаж, төслийн ажлын ерөнхий гүйцэтгэгч болон туслан гүйцэтгэгч компанийн төлөөллүүдтэй уулзаж, зарим асуудлыг шийдвэрлэлээ. “Баянголын амын 2007 айлын орлогод нийцсэн орон сууцны хороолол төсөл” нь 1-3 өрөө эрчим хүчний хэмнэлттэй, орлогод нийцсэн нийт 14 блок бүхий 10 давхар орон сууцны төсөл юм. Өнөөдрийн байдлаар төслийн нийт ажлын гүйцэтгэл 35 хувьтай, барилга угсралтын ажлын гүйцэтгэл 20.9 хувьтай явж байна.
2024 оны наймдугаар сарын 1-нд барилгын ажлын ерөнхий гүйцэтгэгчээр БНСУ-ын “Ил Сонг” ХК шалгарч, орон сууцны барилга угсралтын ажлыг эхлүүлсэн. Харин барилгын ажлын туслан гүйцэтгэгчээр “Сүмбэр цамхаг” ХХК ажиллаж байгаа юм. Төслийн талбайд ажиллах үеэр нийслэлийн Засаг дарга бөгөөд Улаанбаатар хотын Захирагч Х.Нямбаатар 2007 айлын орон сууцны хорооллын төслийн ерөнхий гүйцэтгэгч БНСУ-ын “Ил Сонг” ХК болон туслан гүйцэтгэгч “Сүмбэр цамхаг” ХХК-ийн хооронд барилгын ажлын гүйцэтгэлийн санхүүжилтийн тал дээр маргаан үүсээд байгааг эцэслэж, нийслэлийн Хөрөнгө оруулалтын газраар хяналт хийлгэх үүрэг даалгаврыг холбогдох албаныханд өглөө.
Түүнчлэн НЗД-ын нэгдүгээр орлогч Т.Даваадалайгаар ахлуулсан ажлыг хэсэг 2007 айлын орон сууцны хороолол барьж буй байршилд дахин ирж, асуудлыг шийдвэрлэх, 960 хүүхдийн сургууль, 240 хүүхдийн цэцэрлэгийг нийслэлээс 2026 оны төсөвт суулгаж бариулах, нийт төслийн явцыг саатуулахгүйгээр гэрээний хугацаанд нь орон сууцны хороолол, бусад ажлыг хүлээлгэн өгөхийг хотын дарга Х.Нямбаатар ажил гүйцэтгэгч нарт чиглэл болгов.
Өнөөдрийн байдлаар “Баянголын амын 2007 айлын орлогод нийцсэн орон сууцны хороолол төсөл”-ийн талбайд ерөнхий болон туслан гүйцэтгэгч компаниудын 450 инженер, техникийн ажилтан ажиллаж байна. Төслийг БНСУ-ын Экспорт-Импорт банкны санхүүжилтээр хэрэгжүүлж байгаа учраас ерөнхий гүйцэтгэгч “Ил Сонг” ХК, туслан гүйцэтгэгч “Сүмбэр цамхаг” ХХК-ийн аль ч тал гэрээний үүргээ биелүүлээгүй, гүйцэтгэлийн санхүүжилтийг өгөөгүй зэрэг алдаа зөрчил гаргасан бол гэрээг цуцлах хүртэл арга хэмжээ авна гэдгээ хотын дарга Х.Нямбаатар илэрхийллээ.
2007 айлын орон сууцны хорооллыг 2027 оны III улиралд ашиглалтад оруулах график төлөвлөгөөтэй. Барилга угсралтын ажилд захиалагчийн хяналтыг БНСУ-ын “Аум ба Лий” консорциум гүйцэтгэж, нийслэлийн Орон сууцны бодлогын газар үе шатны ажил болгонд тогтмол хяналт тавьж байгаа юм.
Баянголын амын 2007 айлын орлогод нийцсэн орон сууцны хороолол төслийн хүрээнд:
- Орон сууцны талбай 38-47 ам метр хүртэлх таван төрлийн сонголттой байна.
- 960 хүүхдийн сургууль, 240 хүүхдийн цэцэрлэгийн цогцолбор барина.
- Нийт 35,815.60 ам.метр талбайд зам болон ногоон байгууламж барина.
- Орон сууцаа холбосон 483 автомашины газар доорх дөрвөн тусдаа зогсоол төлөвлөсөн.
- Floated cube буюу байгальд ээлтэй дизайны шийдэлтэй.
- Замын хөдөлгөөний ачааллыг бууруулахад нөлөөлөх зорилгоор 16 байршилд унадаг дугуй хадгалах цэгтэй байна. Мөн цахилгаан машин цэнэглэх станц суурилуулна.
- Өндөр чадалтай LED гэрэлтүүлэг, нарны PV систем, шинэлэг дулаалгын технологийг орон сууцны төсөлд нэвтрүүлж, эрчим хүчний хэмнэлттэй хэрэглээг бий болгохоор төлөвлөсөн.
Сэтгэгдэл бичих