Б.Сэргэлэн нь ХУД-н Цагдаагийн газрын 1-р хэлтсийн мөрдөн байцаах тасгийн ахлах мөрдөгчөөр буюу Авлигын эсрэг хуулийн 4 дүгээр зүйлийн 4.1.1-д заасан нийтийн албан тушаалтнаар ажиллаж байхдаа албан үүрэг, бүрэн эрх албан тушаалын байдлаа урвуулан ашиглаж ххххххх дугаартай эрүүгийн хэрэгт мөрдөн шалгах ажиллагаа явуулахдаа тус хэргийн яллагдагч О-с хохирогч нарт хохирол төлбөрийг надаар дамжуулж өг, бэлнээр аваад ир гэж 2024 оны 11 дүгээр сараас 2024 оны 12 дугаар сарын 02-ны өдрийн хооронд үргэлжилсэн үйлдлээр нийт 6,1 сая төгрөгийг өөрийн танил Ө.А-н Төрийн банкны дансаар дамжуулан авч захиран зарцуулж, өөртөө эдийн засгийн давуу байдал бий болгосон буюу Эрүүгийн хуулийн 22.1 дүгээр зүйл “Эрх мэдэл, албан тушаалын байдлаа урвуулан ашиглах” , 22.1.1-д заасан гэмт хэрэг үйлдсэн гэм буруутайд тооцож прокуророос нийтийн албанд томилогдох эрхийг 2 жилийн хугацаагаар хасах, 1 жилийн хугацаагаар Баянгол дүүргийн нутаг дэвсгэрээс гарахгүй байх буюу зорчих эрхийг хязгаарлах ял оногдуулахаар яллах дүгнэлт үйлджээ.
Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүх хэргийг хэлэлцээд шүүгдэгч Б.Сэргэлэн нь нийтийн албан тушаалтнаар ажиллаж байхдаа, бүрэн эрх албан тушаалын байдлаа урвуулан ашиглаж өөртөө давуу байдал бий болгон тус гэмт хэргийг үргэлжилсэн үйлдлээр үйлдсэн болох нь нотлогдон тогтоогдосон, шүүгдэгч нь хэргийн үйл баримтыг мэдүүлсэн, хорхиролыг бүрэн төлсөн өөрийн үйлдсэн гэмт хэрэгт гэмшиж, гэм буруугаа хүлээн зөвшөөрсөн байдлыг шүүх харгалзан үзэж хорих ял оногдуулахгүйгээр 1 жилийн хугацаанд тэнсэн харгалзах ял, нийтийн албанд томилогдох эрхийг 2 жилийн хугацаагаар хасах ял оногдуулж шийдвэрлэлээ.
БАЯНГОЛ, ХАН-УУЛ, СОНГИНОХАЙРХАН ДҮҮРГИЙН ЭРҮҮГИЙН ХЭРГИЙН АНХАН ШАТНЫ ТОЙРГИЙН ШҮҮХ 2025 ОНЫ 10 ДУГААР САРЫН 08-НЫ ӨДРИЙН ШҮҮХ ХУРАЛДААН
Сэтгэгдэл бичих