“Because I Am a Girl” охидын оролцоо эрхийн аян хоёр үе шаттай боллоо. Эхний шатанд “Би охин болохоор” видео илтгэлийн аянд 21 аймгийн 160 охин оролцож, өөрийн дуу хоолой, тулгамдсан асуудлаа илэрхийлсэн бүтээлүүд илгээсэн. Харин өнөөдөр олон улсын охидын эрхийн өдөр тохиож буй. Энэ өдөр охидын боловсрол, эрх тэгш байдал, манлайллыг дэмжих дэлхий дахины “Because I Am a Girl” (BIAAG) кампанит ажлын хүрээнд Монгол Улсад гурав дахь жилдээ охидын оролцооны чуулган зохион байгуулж байна. Чуулганд 1000 охин оролцож, дөрвөн үндсэн илтгэл тавьж, бодлого тодорхойлогч эмэгтэйчүүд болон оролцогч талуудын дунд “Охидын дуу хоолой бодлогод нөлөөлнө” нээлттэй хэлэлцүүлэг өрнүүллээ.
Олон талын оролцоотой уг чуулганаар охидын эрхийг хамгаалах үр нөлөөтэй бодлого, шийдвэр гаргахад охидын оролцоог нэмэгдүүлэх зорилготой. “Because I Am a Girl” чуулган нь охидыг хамгаалахын зэрэгцээ манлайлагч, шийдэл бүтээгч хэмээн дэмжих, нийгмийн хандлагыг өөрчлөх, төрийн бодлогыг шинэчлэх алхам болно гэдгийг зохион байгуулагчид онцоллоо.
Монгол Улсад хийсэн сүүлийн үеийн судалгаанаас дүгнэхэд охидын эрхийн зөрчил, жендэрийн тэгш бус байдал Монголын нийгэмд олон түвшинд илэрсээр байна. Энэ нь төрийн бодлогын хэрэгжилт, олон нийтийн ойлголт, мэдээлэл түгээлт зэрэг бүх талт цогц, хамтарсан арга хэмжээ шаардлагатайг илэрхийлж байгаа юм. Охидын эрхийн асуудал нь зөвхөн нэг салбарт бус боловсрол, хөдөлмөр, гэр бүл, хууль, соёл, мэдээлэл гэх мэт олон талт системийн сүлжээнд тулгардаг.
Уг чуулганыг охидын ирээдүйг хамтдаа шийдэх нийгмийн хөдөлгөөн болгон өрнүүлэхээ санаачлан, зохион байгуулагч “Монголын сайн дурынхны төв” ТББ зүгээс хэллээ. Охидын чуулганыг Хүүхэд, гэр бүлийн хөгжил, хамгааллын ерөнхий газар, нийслэлийн Засаг даргын Тамгын газар дэмжин ажиллалаа.
Ташрамд, “Because I Am a Girl” нь Plan International байгууллагын 2007 оноос эхлүүлсэн кампанит ажил бөгөөд өнөөдөр дэлхийн 70 гаруй оронд боловсрол, жендэрт суурилсан хүчирхийллээс урьдчилан сэргийлэх, охидын манлайллыг дэмжих олон талт үйл ажиллагаа явуулсаар байна.
Сэтгэгдэл бичих