Монгол Улсын Төрийн соёрхолт, Ардын уран зохиолч, XX зууны утга зохиолын томоохон төлөөлөгч Ш.Сүрэнжавын дурсгалын талбайг Үндэсний цэцэрлэгт хүрээлэнд өчигдөр нээлээ. Энэ үеэр Шаравын Сүрэнжавын дурсгалд зориулсан гэрэлт хөшөөний нээлт болов.
Нээлтийн үеэр ‘Шаравын Сүрэнжав’ сангийн тэргүүн, УИХ-ын гишүүн С.Лүндэг хэлэхдээ, “Дөрвөн жилийн өмнө Шаравын Сүрэнжав санг үүсгэн байгуулан энэхүү дурсгалын цогцолбор барих ажлыг зорьж байсан бол ийнхүү биеллээ олж байна. Энэхүү цогцолбор талбайд утга уран зохиол, яруу найрагт дуртай хэн бүхэн ирж ном уншдаг, номынхоо нээлтийг хийдэг дурсгалын талбай байгаасай гэж хүсэж зорьж байгуулсан. Хүрэлцэн ирсэн бүх хүмүүстээ талархал илэрхийлье. Та бүхэн маань дуртай үедээ ирж, энд сууж, амарч шүлэг найргаа бичиж байгаарай гэж хүсье” хэмээв.
Шаравын Сүрэнжавын дурсгалын талбайд их яруу найрагчийн “Би тэнгэрийн хүү”, “Нэр”, “Ээж минь”, ‘Амьдрал минь, би чамд хайртай’, ‘Бүсгүйчүүл’, ‘Миний нутгийн бараа’, ‘Намуун үдэш’, ‘Миний ардын сэтгэл цагаан’, ‘Арав дахь хавраа үдье’, ‘Нэрээр хийсэн шүлэг’, ‘дөрвөн мөрт’ зэрэг олон сайхан бүтээлийг уншиж танилцах боломж бүрдүүлжээ.
Гурван метрийн өндөртэй хүрэл гэрэлт хөшөөг Төрийн шагналт, уран барималч Ц.Амгалан болон нэрт соён гэгээрүүлэгч Б.Ренчин агсны ач хүү уран барималч Б.Дэнзэн нар урлан мөнхжүүлсэн байна.
Хөшөөний нээлтэд Ш.Сүрэнжав агсны гэр бүлийнхнээс гадна үе үеийн зохиолч, найрагчид нэгэн дорж цуглаж түүнд хүндэтгэл илэрхийлэн, шилдэг бүтээлүүдээс нь уншиж сонирхуулсан юм.
Монголчуудын зүрх сэтгэлд мөнхөд дуулагдах гайхалтай дуунуудаас гадна Монголыг дэлхийд тамгалсан эрийн гурван наадмын тухай цуврал кино, гайхалтай шүлэг, найраглал нь үеийн үед оюун санааны түүчээ болсоор байгаа билээ. Ш.Сүрэнжав агсны олон бүтээлийг ОХУ, Югослав, Герман, Польш, Чех, Итали, Хятад, Солонгос хэлээр орчуулсан бөгөөд 2000 онд “Дэлхийн шилдэг яруу найрагч” олон улсын шагнал хүртсэн юм.
эх сурвалж: Монцамэ
Сэтгэгдэл бичих