“Пари Сен-Жермен” болон Францын шигшээ багийн довтлогч Усман Дембеле “France Football” сэтгүүлээс улирлын шилдэг хөлбөмбөгчинд олгодог “Алтан бөмбөг” (Ballon d’Or) шагналын эзэн боллоо.Хоёрдугаар байрыг “Барселона” болон Испанийн шигшээ багийн залуу тоглогч Ламин Ямал эзэлжээ. Энэ оны долоодугаар сард 18 нас хүрсэн тэрбээр Раймон Копагийн нэрэмжит (21-ээс доош насны) оны шилдэг залуу хөлбөмбөгчинд олгодог шагналыг хүртлээ. Санал хураалтад гуравдугаар байрыг ПСЖ-гийн хагас хамгаалагч, португал тоглогч Витинья эзэлсэн байна.
Өдгөө 28 настай Усман Дембеле өнгөрсөн улиралд ПСЖ-гийн бүрэлдэхүүнд Францын аварга шалгаруулах тэмцээн, цомын түрүүг уламжлал ёсоор хүртсэнээс гадна Аваргуудын лиг, УЕФА-гийн Супер цомд түрүүлж, мөн клубүүдийн дэлхийн аваргын шалгаруулах тэмцээний финалд шалгарчээ. Тэрбээр энэхүү нэр хүндтэй шагналыг хүртсэн зургаа дахь франц тоглогч боллоо. Түүнээс өмнө Раймон Копа (1958), Мишел Платини (1983, 1984, 1985), Жан-Пьер Папен (1991), Зинедин Зидан (1998), Карим Бензема (2022) нар хүртэж байсан юм.
Эмэгтэйчүүдийн хөл бөмбөгийн төрөлд “Алтан бөмбөг” шагналын эзнээр “Барселона” багийн тоглогч Айтана Бонмати гурав дахь удаагаа тодорлоо. Оны шилдэг эмэгтэй дасгалжуулагчид олгодог Йохан Кройффын нэрэмжит шагналыг Английн шигшээ багийн нидерланд дасгалжуулагч Зарина Вигман, Лев Яшины нэрэмжит шагналыг хаалгач Ханна Хэмптон хүртсэн бол эмэгтэйчүүдийн оны шилдэг клубээр Аваргуудын лигт түрүүлсэн Лондоны “Арсенал” шалгарчээ.
Шилдэг эрэгтэй дасгалжуулагчаар Аваргуудын лигийн аварга ПСЖ багийн испани дасгалжуулагч Луис Энрике тодорчээ.
Шилдэг эрэгтэй хаалгачаар Италийн аварга Жанлуижи Доннарумма шалгарсан байна. Энэ улиралд “Манчестер Сити”-д шилжиж ирсэн тэрбээр өнгөрсөн улиралд ПСЖ-гийн бүрэлдэхүүнд гайхалтай тоглолт үзүүлснийхээ төлөө Л.Яшины нэрэмжит шагналыг хүртэж байсан юм.
Эх сурвалж: монцамэ
Сэтгэгдэл бичих