Энэ сарын 9-ний өдрийн оройн 22:00 цагийн орчимд Зам, тээврийн хөгжлийн яам буюу Засгийн газрын 13 дугаар байрны гадна хүн амины хэрэг гарч, тус яамны Хяналт шинжилгээ, үнэлгээ, дотоод аудитын газрын дарга, 38 настай Г гэх залуу харамсалтайгаар амь насаа алдсан билээ.
Түүнийг ЗТХЯ-ны Төрийн захиргаа удирдлагын газрын дарга, 48 настай Б.Махбал гэгч хөнөөсөн болох нь тогтоогдож, өдгөө цагдан хорих 461-р ангид хоригдон шалгуулж байна. Архидан согтуурсны улмаас хоёр айлын амьдрал сүйрч, нэг нь шоронд, нөгөө нь шороонд булагдсан нь харамсалтай.
Төрийн алба хашдаг, тэр тусмаа яамны удирдах албан тушаалтнууд ажлын байрандаа ийн архидан согтуурч, улмаар нэгнээ хөнөөсөн нь байж боломгүй асуудал бөгөөд сүүлийн өдрүүдэд ард иргэдээс ихээхэн шүүмжлэл хүртсэн.
Энэ сарын 12-ны ням гаригт Засгийн газар шуурхай хуралдаж, ЗТХЯ-ыг удирдаж байсан сайд, дэд сайд, ТНБД, газрын долоон даргыг үүрэгт ажлаас нь чөлөөлсөн билээ.
Гэвч дарга нарт нь хариуцлага хүлээлгэж ажлаас чөлөөлөөд өнгөрөх юм биш хамт архидан согтуурч, хэвлэлүүдээр бичиж буй шиг талийгаачийг гурван цагийн турш зодож амь насанд нь халдаж байхад хараад, хамт архидаад байж байсан таван хүнд арга хэмжээ авсан уу, тэднийг эрүүгийн хариуцлагад татсан уу гэх асуулт олон нийтийн дунд хөвөрсөөр байна.
-Тодруулбал хамт архи уусан тус яамны Төмөр зам, далайн тээврийн бодлогын хэрэгжилтийг зохицуулах газрын дарга Б.Артур,
-Төмөр замын бодлогын хэрэгжилт, зохицуулалт хариуцсан ахлах мэргэжилтэн Б.Лхагвасүрэн,
-Авто замын бодлогын хэрэгжилтийг зохицуулах газрын дарга Э.Энхбат,
-Хүний нөөцийн асуудал хариуцсан ахлах мэргэжилтэн Д.Цэцэгмаа,
-Мэргэжилтэн Н.Ганбаяр нарт ямар хариуцлага оногдуулсан, сайд, дарга нар шиг нь ажлаас чөлөөлсөн эсэх нь тодорхойгүй байна. Яамны зүгээс ч энэ талаар ямар ч мэдээлэл өгөхгүй байгаа бөгөөд цагдаагийн байгууллага ч “Мэдээлэл өгөх боломжгүй” хэмээн цааргалж байна.
Талийгаач залууг зодож байхад Б.Махбал гэгч этгээдийн үйлдлийг таслан зогсоогоогүй бөгөөд амь тасрах үед нь анхны тусламж үзүүлээгүй эдгээр таван хүн хариуцлага хүлээх ёстой биш гэж үү.
Б.БУРМАА
Сэтгэгдэл бичих