Засгийн газар ээлжит бусаар хуралдаж, Оюутолгойн 3 их наядын ногдол ашгийн зарцуулалтын талаарх хуулийг татан авах асуудлыг хэлэлцэж, буцаан татахаар шийдвэрлэжээ.
Энэ талаар Сангийн сайд З.Мэндсайхан “Иргэдийн олонх нь Оюутолгойн ногдол ашгийг “Хуримтлалын сан”-д хадгалах санал өгсөн тул 2 их наядыг төсөл, арга хэмжээнд зарцуулах саналаа буцаан татлаа” гэж мэдэгдсэн юм.
Засгийн газрын зүгээс энэ онд Оюу толгойн ногдол ашгаар 3 их наяд төгрөгийг авч, 2 их наядаар төсөл хөтөлбөр санхүүжүүлж, 1 их наядыг баялгийн санд төвлөрүүлэхээр хуулийн төсөвт суулган УИХ-д өргөн мэдүүлсэн байдаг. Улмаар энэ талаараа иргэдээс санал асуулга хүртэл авсан. Ногдол ашгийг иргэдэд тараах ёстой, эсхүл баялгийн санд нь бүгдийг төвлөрүүлэх нь зөв хэмээн өнгөрсөн хугацаанд нийгмийн сүлжээд хэлэлцүүлэг өрнөөд амжсан билээ.
Эргэн сануулахад, 2 их наяд төгрөгийг дараах байдлаар хуваарилсан байсан юм.
- 300 МВт-ын шинэ ДЦС-6 барих, цахилгаан станцуудыг засварлан шинэчлэхэд 789.7 тэрбум төгрөг зориулахаар санал болгосон.
- ДЦС-3-ын дэргэд ДЦС-6 барих, 10 аймагт ДЦС барих төслүүд багтсан.
- Арьс ширний боловсруулах үйлдвэр байгуулах санал бий.
- Зургаан бүс бүрд Кэмбрижийн хөтөлбөртэй хоёр сургууль, нэг төрөлжсөн ахлах сургууль барихад зориулна хэмээж байв.
Сэтгэгдэл бичих