Суралцагч бүрийн тэгш оролцоо, идэвхтэй суралцах үйлийг дэмжиж, ээлжит хичээл, сургалт, үйл ажиллагааны чанар, үр өгөөжийг сайжруулах замаар тэдний мэдлэг, чадвар, төлөвшилд бодит ахиц гаргах зорилгыг 2025-2026 оны хичээлийн жилд дэвшүүлж байна.
Энэхүү зорилтыг хангах чиглэлээр дараах зорилтыг хэрэгжүүлнэ.
Сургуулийн өмнөх боловсролын сургалтын хөтөлбөрийг үндэсний хэмжээнд хэрэгжүүлж эхлэх, хэрэгжилтийн явц, үр нөлөөг мэргэжлийн багш нарын бүлгээр хэлэлцэн багшид зөвлөн тусалж өдөр тутмын сургалт, үйл ажиллагааны чанарыг сайжруулах;
Бага боловсролын сургалтын хөтөлбөр (шинэчилсэн)-ийг 2026-2027 оны хичээлийн жилээс хэрэгжүүлэх бэлэн байдлыг ханган багш бүр хөтөлбөрийг судалж, сургалтын хэрэглэгдэхүүн, орчныг бэлтгэх;
Багшийн мэргэжлийн хөгжлийг дэмжих сургалт, үйл ажиллагааг сургалтын хөтөлбөр хэрэгжүүлэх арга зүй, технологийг сайжруулах, цэцэрлэг, сургуульд суурилсан мэргэжил дээшлүүлэх сургалт болон мэргэжлийн багш нарын бүлгийн хамтын ажиллагааг өргөжүүлж, багшийн мэргэжлийн бие даасан байдлыг хангахад чиглүүлэх;
Суралцагч амжилттай суралцахад шаардагдах суурь болон ерөнхий чадамж эзэмшүүлэх сайн туршлага, арга зүй, технологийн санг бүх түвшинд бүрдүүлж, үр дүнтэй ашиглах;
Сургалт, үйл ажиллагааны явцын болон үр дүнгийн үнэлгээнд үндэслэн суралцахуйн хоцрогдлыг нөхөх, хоцрогдох магадлалтай суралцагчдад дэмжлэг үзүүлэх үйл ажиллагааг үр дүнтэй хэрэгжүүлж ахиц гаргах;
Ялгаатай хэрэгцээт суралцагч боловсрол эзэмшихэд тулгарч байгаа саад бэрхшээлийг бууруулах, тэдний онцлог хэрэгцээнд тохирсон дэмжлэг, үйлчилгээ, боломжит тохируулга (сургалтын хөтөлбөр, агуулга, арга зүй, үнэлгээ, хэрэглэгдэхүүн, орчин зэрэг) хийж, боловсролд хамрагдалтыг нэмэгдүүлэн сурах үйлийг бүх талаар дэмжих;
Суралцагчдын нас, хөгжлийн онцлогт нийцүүлэн номын ач тусыг таниулах, анги, бүлгээр ном, зохиол хамтран унших соёл, дадал хэвшүүлэх, номыг бүтээлчээр унших чадвар (мэдээлэл хайх, ойлгох, шүүн тунгаах, хэрэглэх, дүгнэх, өөрийн санаа бодлоо илэрхийлэх)-ыг хөгжүүлэхэд чиглэсэн үйл ажиллагааг үр дүнтэй хэрэгжүүлэх;
Суралцагчдад эрүүл мэнд, сэтгэл зүй, хүүхэд хамгааллын мэргэжлийн үйлчилгээг тэгш хүртээмжтэй, чанартай үзүүлэх, хүчирхийллээс ангид, айдасгүй, амар тайван, ээлтэй орчинд сурч, хөгжих нөхцөлийг тэдний оролцоонд суурилан бүрдүүлэхэд мэргэжлийн байгууллага, нийгмийн түншлэлийн хамтын ажиллагааг өргөжүүлэх, үр нөлөөг үнэлэх;
Гамшгийн эрсдэлийг танин мэдэх, урьдчилан сэргийлэх, болзошгүй аюул, эрсдэлийн үед өөрийгөө болон бусдыг хамгаалах, туслах, анхны тусламж үзүүлэх, сэтгэл зүйн хувьд бэлэн байх мэдлэг, чадвар, дадал (дадлага, сургуулилт) хэвшилтэй болоход суралцагчдад дэмжлэг үзүүлэх олон талт арга хэмжээг мэргэжлийн байгууллагатай хамтран зохион байгуулж, тэдний гамшгийн эрсдэлийг даван туулах чадварт ахиц гаргах;
Сургалтын байгууллагын орчинд өндөр хурдны интернэт, ухаалаг төхөөрөмжийн хүртээмжийг нэмэгдүүлж, багш, суралцагч цахим технологийн тусламжтай бие даан суралцах, ирээдүйн иргэнд шаардагдах чадамж эзэмших, хиймэл оюун ухааныг ёс зүйтэй, бүтээлчээр ашиглах, олон хэлний чадвараа хөгжүүлэх, хэрэглэх үйл ажиллагааг бүх түвшинд дэмжих.
Сэтгэгдэл бичих