Францын эрх баригчид 2 тэрбум еврогийн цэргийн тусламжийг Украинд нэмж үзүүлэхээр шийдвэрлэжээ. Энэ тухай Францын Ерөнхийлөгч Эммануэл Макрон Украины Ерөнхийлөгч Владимир Зеленскийтэй гуравдугаар сарын 26-ны лхагва гарагт Парист хамтарсан хэвлэлийн бага хурал хийх үеэрээ мэдэгдсэн байна.
Цэргийн шинэ багц тусламжид танк эсэргүүцэгч пуужингууд, “газар-агаар” ангиллын пуужингууд, нисгэгчгүй онгоцууд багтжээ.
Францын Ерөнхийлөгч Э.Макрон “урьдчилсан болзолгүйгээр” Украинд 30 хоногийн хугацаанд гал зогсоохыг зөвшөөрөхийг Оросын талд хандан уриалжээ. Тэрбээр мэдэгдэхдээ, Украины дайныг зогсоох талаар АНУ-тай хийсэн хэлэлцээний үеэр хэсэгчлэн гал зогсоохыг зөвшөөрснөөрөө Орос улс “дайныг дуусгахыг хүсэхгүй байгаагаа” дахин харууллаа гэжээ.
ОХУ-ын эсрэг авсан хориг арга хэмжээнүүдийг цуцлах тухай ярихад эрт байна гэж тэрбээр хэлсэн байна.
Украины Ерөнхийлөгч В.Зеленский Оростой гал зогсоох тохиролцоонд хүрсэн тохиолдолд Украинд цэргээ илгээхэд бэлэн гэдгээ илэрхийлсэн орнуудын удирдагчдын уулзалтын өмнө Парист хүрэлцэн иржээ.
Д.Жаргал
Эх сурвалж: “Монцамэ” агентлаг
Сэтгэгдэл бичих