АН-ын гишүүн Г.Хажидмаа 2024 оны сонгуульд АН-аас Л.Гантөмөр, С.Баярцогт, С.Эрдэнэ, Х.Баттулга, Б.Жаргалан нарыг намын жагсаалтад оруулахгүй байхыг шаардаж, мэдээлэл хийлээ. Тэрбээр намын анхан шатны гишүүдийн дунд санал асуулга явуулж, нэр дэвшигчдийг тодруулах шаардлагыг АН-ын удирдлагуудад тавьж байна.
Тэрбээр “2024 оны сонгуульд жагсаалт гэх луйварчдын төрд орогнож, ял наймаалцах аймшигтай зүйл гараад ирсэн. Тиймээс АН ёсзүйтэйгээр анхан шатны гишүүдийнхээ саналаар УИХ-д нэр дэвших лидерүүдээ сонгуульд илгээмээр байна.
АН-ын ял наймаалцдаг луйварчид нь МАН-тай тохиролцож, УИХ-д орж суудаг. Сүүлийн найман жилд АН нэг ч удаа сөрөг хүчин байж чадсангүй. Хэзээ сөрөг хүчний дуу хоолойгоо хүргэхийг Монголын ард түмэн хүлээсээр байна. АН-ын өнөөгийн дарга нар морь унаж, гоё зураг авахуулсан л дарга нар байна. Бодит байдал дээр С.Баярцогт, Л.Гантөмөр зэрэг дарга нар МАН-ынхны өрөөнд орж, хамт цай ууж явдаг. Гарч ирээд Монголын ард түмэн, АН-ын жирийн гишүүдийг хуурсаар байна.
Энэ хүмүүсийг жагсаалтад оруулахгүй. Би жирийн иргэдээс тусламж хүснэ. АН дахиад зарагдах уу. Дахиад зарагдвал Монголын нийгэм илүү их доройтно.
АН-ыг зарж, ял наймаалцаж байгаа. Энэ хүмүүс 20 жил дарга хийсэн, одоо ч мөнгөн бороо оруулж дарга хийж байна. Ядуу анхан шатны гишүүдэд мөнгөн бороо оруулж, доромжилж байгаад намын даргын албан тушаалыг худалдаж авч байна. Жаахан ч гэсэн шударга ёс хүсэж байгаа бол энэ хүмүүсийг дэмжмээргүй байна.
Батбаярын охин Жаргалан АН-ын эмэгтэйчүүдийн холбоог худалдаж авсан. Нэг ч удаа сөрөг хүчин хийгээгүй, нэг ч удаа хүүхдийн эрхийн төлөө дуугараагүй. Мөнгөн бороо орж, Ардчилсан эмэгтэйчүүдийн холбоог худалдаж авсан. АЭХ-ны тэргүүн Б.Жаргалан жагсаалтад орохгүйгээр эмэгтэйчүүдээ манлайлаад тойрогт очиж нэр дэвш. Чаддаг юм бол ялаад, Төрийн ордонд орж сөрөг хүчин хий. АЗХ-ны удирдлагууд ч тойрогт очиж дэвшиж, манлайл” гэсэн шаардлагыг тавилаа.
Мөн тэрбээр С.Баярцогт болон түүний нөхөд өнөөдөр АН-ыг зарахаар МАН-тай тохиролцох гээд Төрийн ордноос салахгүй байна. Энэ хүмүүсийг нэр дэвшвэл АН-ыг битгий сонгоорой, ард түмнээс гуйж байна. Энэ хүмүүс АН-ын анхан шатны мянга мянган гишүүдээ зарна, ялаа наймаалцана, тэд л баяжина гэж үзэж байгаагаа илэрхийллээ.
Сэтгэгдэл бичих