Сүүлийн үед хувийн эрх ашгийн үүднээс бусдын нэр төрд халдах, улмаар гутаан доромжлох зорилгоор хувь хүний нууцад хамаарахуйц бичлэг, зургийг олон нийтийн сүлжээнд тараах болсон. Хамгийн том жишээ бол УИХ-ын гишүүн Ч.Ундрамын бичлэгийг нууцаар хийж сошиалд цацсан Б.Наранцацралт гэх залуугийн кэйс юм. Тэгвэл энэхүү үйлдэл хууль, эрх зүйн талаасаа ямар хариуцлага хүлээх үйлдэл вэ гэдэг дээр хуульч Р.Булгамаа тайлбар хийжээ.
Тэрбээр, “Хувь хүний халдашгүй эрхийн талаар хуулиар хуульчилан зохицуулсан байдаг. Хүний хорвоод эргээд уулзахгүй юм шиг хүүхдүүдийнхээ ертөнц, ирээдүйг үл хүндэтгэн хандах нь бас л хуулийн зохицуулалттай. Тэр дундаа хүүхдийг өөрийх нь зөвшөөрөлгүй дуу дүрсний бичлэг хийж, тараах түгээх ч хуулийн зохицуулалттай байдаг.
Цахим орчинд гэр бүлийн бичлэгээ түгээх нь хэвийн байж болох үзэгдэл мэт нийтлэг ойлголт түгээд байгаа тул хууль зүйн зохицуулалтын талаар дүгнэлт хийе.
Гэр бүлийн бичлэг тавигдаж эхлэх үед гэр бүл цуцлах иргэний хэрэг нь шүүх дээр ажиллагаа хийгдэж байгаа тухай зарласан. Энэ нөхцөл байдал нь;
1-рт Хэрэг хянан шийдвэрлэх ажиллагааны үед нөгөө тал нь ялахын тулд хууль бусаар нотлох баримт цуглуулж эхэлсэн нь Эрүүгийн хуульд заасан хэд хэдэн гэмт хэргийн шинжийг агуулж байж болзошгүй юм.
Үүнд:
1. Эрүүгийн хуулийн 13.11 дүгээр зүйл “Хувь хүний нууцыг задруулах “
Хувь хүний хуулиар хамгаалагдсан нууцыг олж мэдсэн хүн өөрийнх нь зөвшөөрөлгүйгээр задруулсан бол нэг мянга гурван зуун тавин нэгжээс арван мянган нэгжтэй тэнцэх хэмжээний төгрөгөөр торгох, эсхүл зургаан сараас хоёр жил хүртэл хугацаагаар зорчих эрхийг хязгаарлах, эсхүл зургаан сараас хоёр жил хүртэл хугацаагаар хорих ял шийтгэнэ.
2. Эрүүгийн хуулийн 13.5-р зүйл “Заналхийлэх”
Бусдыг тодорхой үйлдэл хийх, хийхгүй байхыг шаардаж өөрт нь, түүний ойр дотны хүнд хүч хэрэглэсэн, хүч хэрэглэхээр заналхийлсэн, эсхүл эрх, хууль ёсны ашиг сонирхолд нь хохирол учруулж болохуйц баримт, мэдээлэл тараахаар сүрдүүлсэн бол дөрвөн зуун тавин нэгжээс хоёр мянга долоон зуун нэгжтэй тэнцэх хэмжээний төгрөгөөр торгох, эсхүл нэг сараас зургаан сар хүртэл хугацаагаар зорчих эрхийг хязгаарлах ял шийтгэнэ.
Хэрэв дээрх үйлдлүүд нь гэр бүл цуцлах иргэний хэрэг дээр нэхэмжлэлийн шаардлагаас татгалзуулах арга хэрэгсэл болж байгаа бол мөн
3. Эрүүгийн хуулийн 17.6-р зүйлийн “Бусдын эд хөрөнгийг авахаар заналхийлэх”
Бусдыг эд хөрөнгө, эдийн, эдийн бус хөрөнгийн эрхээ шилжүүлэн өгөхийг шаардаж өөрт нь, түүний ойр дотны хүнд хүч хэрэглэсэн, хүч хэрэглэхээр заналхийлсэн, эрх, хууль ёсны ашиг сонирхолд нь ноцтой хор уршиг учруулж болохуйц баримт, мэдээлэл тараахаар сүрдүүлсэн бол арван мянган нэгжээс дөчин мянган нэгжтэй тэнцэх хэмжээний төгрөгөөр торгох, эсхүл хоёр жилээс найман жил хүртэл хугацаагаар хорих ял шийтгэнэ.
Хүүхдийн эрхийн зөрчил талаас дүгнэвэл Зөрчлийн тухай хуулийн 6.20-н 3.2, 6.20-8д заасан зөрчил болон Эрүүгийн хуулийн 16.7-д заасан гэмт хэргийн шинж байж болзошгүй.
Эрүүгийн хуульд заасан гэмт хэрэг үйлдэн, үйлдэн нотлох баримт гаргаж байгаа хүнд ёс суртахууны тухай яриад ч нэмэр байхгүй.
Хэн нэгэн хүн зорилгодоо хүрэхийн тулд салж байгаа эхнэр, хүүхдүүддээ амьдрах орон зай үлдээхгүй болтол үйлдэл хийж байхад нийгмээрээ алга ташин баяр хүргэх нь энэ нийгэм хүчирхийлэгчийг дэмжсэн мэт болохгүй гэж үү…
Магадгүй тэр хүнд сошиал эрүүдэн шүүлтээс өмнө хуулийн байгууллагаар шалгуулах эрх нь уул нь нээлттэй” гэжээ.
Өөрөөр хэлбэл иргэн Б.Наранцацралт нь гэр бүлийн нууц бичлэг хийж, түүнийг хувийн эрх ашигаа хангахаар олон нийтэд цацсанаараа Эрүүгийн хуулийн 4 зүйл ангиар яллагдах гэмт хэрэг үйлджээ.
Сэтгэгдэл бичих