213 зорчигч тээвэрлэж явсан метроны галт тэрэг орон нутгийн цагаар 20:45 орчимд Петронас цамхагийн ойролцоох хонгилд хоосон вагонтой мөргөлджээ. Засвараас дөнгөж гарсан хоосон галт тэргийг өртөөнд хүргэхээр эсрэг чиглэлд явж байсан аж. Хотын цагдаагийн газрын дарга Мохамад Зайнал Абдуллаын хэлснээр, одоогоор ямар нэг халдлгын шинж эмдэг мэдэгдээгүй гэлээ.
“Нөхцөл байдлыг үргэлжлүүлэн шалгаж байна. Метро ашиглалтын удирдлагын төвөөс буруу дохио өгч, осол гаргасан байж болзошгүй гэж бид үзэж байна” хэмээн тэр хэллээ.
Осолд өртсөн 213 хүний 47-ийнх нь биеийн байдал хүнд байна. Метро мөргөлдсөнөөс хойш хэдэн цагийн дараа олон нийтийн сүлжээнд тавигдсан дүрс, бичлэгүүдэд хагарсан шилээр хучигдсан метроны бүхээг, шалан дээр цус алдан хэвтэх зорчигчдыг харуулж байв.
Малайзын Ерөнхий сайд М.Ясин хотын хөл хөдөлгөөн ихтэй KLCC станцын ойролцоо болсон ослыг “ноцтой” гэж мэдэгджээ. Тэрбээр галт тэрэгний оператор компани болон тус улсын Тээврийн сайд нарт ослын шалтгааныг тодруулах яаралтай шалгалт хийх үүрэг өглөө.
Харин Тээврийн сайд Ви Ка Сионг хэрэг явдлыг метроны систем нь ажиллаж эхэлсэн 23 жилийн хугацаанд гарсан анхны томоохон осол гээд бүрэн мөрдөн байцаалт явуулахаа амлав.
Сэтгэгдэл бичих