Замын хөдөлгөөний аюулгүй байдлыг хангах үндэсний хөтөлбөрийн хүрээнд 2021 онд хэрэгжүүлэх тусгай үйл ажиллагааны төлөвлөгөөний талаарх уулзалтыг Зам, тээврийн хөгжлийн яаманд зохион байгуулжээ. Уулзалтад Зам, тээврийн хөгжлийн сайд Л.Халтар, Замын хөдөлгөөний аюулгүй байдлын үндэсний зөвлөлийн ажлын албаны дарга Б.Ганзориг, нийслэлийн Зам, тээврийн асуудал хариуцсан төслүүдийн удирдагч Б.Одсүрэн, Тээврийн цагдаагийн албаны дарга, цагдаагийн хурандаа О.Ганбат, нийслэлийн замын хөдөлгөөний төлөвлөлт, зохицуулалт инженерчлэлийн газрын дарга С.Энхтөр нар оролцсон байна.
ОХУ-ын Москва хот 180 мянган камертай бөгөөд телехяналтын төслийг 2012 оноос дөрвөн үе шаттай хэрэгжүүлснээр гэмт хэргийн 70 хувийг илрүүлж, гаралтыг 19 хувиар бууруулжээ.
2021 онд Улаанбаатарын хэмжээнд ашиглаж байгаа камерын хэрэглээг стандартаар баталгаажуулан 35 хүртэлх хувиар нэмэгдүүлэхээр төлөвлөсөн байна.
Мөн мотоцикльд тавигдах стандартыг боловсруулж батлуулах, улсын чанартай авто зам дагуух суурин газрын ерөнхий боловсролын сургууль орчмын бүсийг хөдөлгөөний аюулгүй байдлын стандартын дагуу иж бүрэн жишиг болгон тохижуулах ажлыг зохион байгуулахаар төлөвлөжээ. Түүнчлэн замын түгжрэлийг бууруулах чиглэлээр явган хүний гарам (нүхэн болон гүүрэн)-ыг стандартад нийцүүлэн барьж байгуулах, улсын чанартай авто зам дагуу 200 км тутамд зам тээврийн ослын үед эмнэлгийн тусламж дуудах үүрэн телефоны сүлжээ, анхны тусламж үзүүлэх цэгийг байгуулах юм байна.
Сэтгэгдэл бичих