Ерөнхий сайд Л.Оюун-Эрдэнийн танхимын Соёлын сайдаар ‘Монгол ТВ’-ийн захирал Ч.Номин ажиллахаар болжээ.
Ерөнхий сайд өнөөдөр сайд нарынхаа нэрийг УИХ, Ерөнхийлөгчтэй зөвшилцөхөөр хүргүүлнэ. Тэрээр энэ удаад Засгийн газрын бүтцэд өөрчлөлт оруулахгүй гэсэн бол бүрэлдэхүүний тал хүрэхгүй хувьд өөрчлөлт оруулахаар болсон байна. Тодруулбал, өмнөх Засгийн газарт ажиллаж байсан аж ахуйн салбарын сайд нараа авч үлдээхээр болжээ. Харин Гадаад харилцаа, Соёл, Сан, Эрүүл мэнд, Боловсрол, Байгаль орчны сайд нарыг солих аж. Гэхдээ танхимын сайд нарын нэр одоог хүртэл бүрэн тодорхой болоогүй байгаа юм. Тодруулбал, Сан, Байгаль орчин аялал жуучлал, Эрүүл мэндийн сайдад хэнийг томилохоо тохирч чадахгүй байгаа аж.
Ч.Номин гэж хэн бэ
Монгол телевизийн захирал Ч.Номин нь 10 жилийн 45 дугаар дунд сургууль, Их Британийн Ийст Англиа Их Сургуулийг эдийн засгийн чиглэлээр тус тус төгссөн. 2006-2007 онд Гацуурт Группийн Гадаад Харилцааны Захирал, 2007 оноос Тэрэлж зочид буудлын Ерөнхий Менежер, 2011 оны 2 сараас эхлэн Монгол ТВ-ийн захирлаар ажиллаж байна. Түүний аавийг Чинбат гэдэг бөгөөд Гацуурт компанийн захирал.
Ажлын түүхэн замнал:
Ч.Номин ажлын анхны гараагаа байгалийн цогцолбор газар болох 5 одтой Тэрэлж буудлаас эхэлж байжээ. Ч.Номин Их сургуульд сурч байх үед Тэрэлж дэх зочид буудал нь баригдаж байсан. Их сургуулийн нэгдүгээр дамжаанд байхад Тэрэлж буудлын дизайн гарч байсан ба тухайн үед Канадын мэргэжилтнүүд буудлын дизайны ажлыг хийж байсан учраас долоо хоног бүр Канад явж ажлын гүйцэтгэлийнх нь талаар уулзаж, саналаа хэлдэг байжээ.
2011 оноос хойш Монгол HD телевизийн захирлаар ажиллаж байна.
2010 оны Бизнесмен эмэгтэй шагнал- Монголын Эмэгтэйчүүдийн Холбоо
2011 оны Fun Fearless Female шагналд нэр дэвшсэн- Космополитан сэтгүүл
2013 оны Телевизийн салбар дахь Дэлхийн нөлөө бүхий 25 эмэгтэйн нэг- ‘Hollywood Reporter’
2015 Монголын Хэвлэл Мэдээллийн Ёс зүйн зөвлөлийн Удирдах зөвлөлийн дарга
Сэтгэгдэл бичих