УИХ-ын чуулганы нэгдсэн хуралдаанаар Л.Оюун-Эрдэнийг Ерөнхий сайдаар томилох тухай асуудлыг хэлэлцэж байна. Чуулганы хуралдаанд оролцож буй гишүүд түүнээс асуулт асууж, саналаа хэлж байна.
Д.Батлут: -Дээд боловсролын тогтолцоог хэрхэн өөрчлөх вэ. Дээд боловсрол эзэмшсэн олон залуу өөр ажил хийгээд явж байна. Шинжлэх ухааны салбараа цаашдаа хэрхэн авч явах вэ. Таны батлуулсан ‘Алсын хараа 2050’ бодлогын баримт бичигт ‘2021 он гэхэд шинжлэх ухааны салбарт улсын төсвийн нэг хувийг зарцуулна’ гэж заасан. Өнөөдөр хэд байгаа билээ. Энэ мэтээр зорьсон зүйлсээ хэрэгжүүлэх боломж байна уу. Нийгэмд өгөөжтэй төслүүдийг хэрхэн дэмжих вэ?
Л.Оюун-Эрдэнэ: -Монгол хүүхэд дэлхийд оюуны чадавхаараа долоодугаар байрт жагсдаг. Гэтэл бусад үзүүлэлтээрээ энэ байр нь ухарч явдаг. Тиймээс их, дээд сургуулийн боловсролын асуудал дээр анхаарах зайлшгүй шаардлагатай. Ирэх жилүүдэд боловсролын тогтолцооны томоохон шинэчлэлийг хийнэ. Эдийн засгийн тэргүүлэх чиглэлүүдээ тодорхойлох ёстой. Тэр чиглэлд ажиллах боловсон хүчнээ бэлтгэх тогтолцооны шинэчлэлийг хийнэ. Боловсролын шинэчлэлийн багц хуулийг боловсруулсан. Үүнийг хаврын чуулганаас өмнө өргөн барина. Шинжлэх ухааны салбарыг дэмжинэ. Тэр тусмаа бүтээгч үйлдвэрлэлийн салбарыг тэргүүн эгнээнд тавина. Шинжлэх ухааны байгууллагуудыг их, дээд сургуулиудтай уялдуулан эдийн засагжуулах шаардлагатай. Ингэж байж эдийн засаг тогтмол хурдацтай өснө. Тиймээс энэ чиглэлд Засгийн газар зоригтой алхам хийх болно.
Сэтгэгдэл бичих