Монгол Улсын гавьяат тамирчин, сонирхогчдын боксын Олимп, дэлхийн мөнгөн медальт, Мэргэжлийн боксын IBO ( International Boxing Organization) холбооны 57,2 кг-ийн жингийн Дэлхийн аварга болж, WBC ( World boxing council) холбооны 57,2 кг-ийн жинд Дэлхийн аварга цол, бүсийн төлөө тулаанд өнгөрөгч хоёрдугаар сард тоглож, оноогоор ялагдсан ‘KING TUG’ Нямбаярын Төгсцогт маань энэ есдүгээр сарын 19-нд Мексикийн “Zurdito” (Солгой) хочит Эдуардо Рамирес хэмээх боксчинтой “title eliminator” статустай (хэн ялсан нь дараа нь дэлхийн аварга цолын төлөө тулалдах эрхтэй болно гэсэн үг) Коннектикут мужийн Анкасвилль хотын ‘Mohegan Sun Casino& Hotel’ цогцолборын 12000 хүний суудалтай “ Mohegan Sun Arena” ордонд тулалдахаар болсныг өмнө нь мэдээлсэн билээ.
WBC -ийн журам ёсоор боксчдыг тулаанд орохоос гурван сар, нэг сар, хоёр долоо хоног, долоо хоногийн өмнө допингийн болон ямар нэг мансууруулах төрлийн бодис хэрэглэсэн эсэхийг шалгаж, эмнэлгийн үзлэгт оруулж, урьдчилсан жинг үзэж тулаанд оруулах эсэхийг шийддэг. Сүүлийн үед цаг үеийн нөхцөл байдлаас шалтгаалж, ‘ковид-19’-ийн шинжилгээг мөн авч байгаа юм.
Энэ ёсоор өчигдөр өгсөн сорьц, шинжилгээнд Эдуардо Рамиресийн ковид-19-ийн сорьц эерэг буюу халдвартай гарсан байна.
Тиймээс WBC холбооноос Төгсөөгийн шинэ өрсөлдөгчийн нэрийг өнөөдөр зарлалаа. WBC холбооны featherweight буюу 57,2 кг-ийн жингийн чансааг манлайлж, нэгдүгээрт бичигдэж буй манай Н.Төгсцогттой Барбадосын ‘Soldier’ Кобиа Брийдитэй тулалдуулахаар шийдвэрлэжээ.
К. Брийди нь энэ жил 28 настай, 2014 оноос мэргэжлийн бокст орохоосоо өмнө сонирхогчдын боксоор Барбадосын өмнөөс Олимпийн наадам, Хамтын нөхөрлөлийн орнуудын наадамд оролцож байсан, мэргэжлийн боксын рингэнд ‘Soldier’ ( Барбадосын армид алба хааж байсан тул ийм хоч нэр авсан гэнэ) хочтой гарч, 15 удаа ялалт ( 5 КО) байгуулсан,одоогоор ялагдаж үзээгүй яваа боксчин юм. Тэрбээр 163 см өндөр нуруутай, хоёр гарын алд 155 буюу өөрөөр хэлбэл жижиг биетэй, чац бага тамирчин байна. “Цэрэг” АНУ-ын нийслэл Вашингтон Ди Си хотноо бэлтгэлээ хийдэг аж.
Хоёр боксчны тулааныг SHOWTIME тв сувгаар 2020 оны есдүгээр сарын 19-ний орой Америкийн баруун эргийн цагаар 18:00 цагаас шууд дамжуулан үзүүлэх юм.
