Цахилгаан, дулааны үнэ нэмэгдэхгүй гэдгийг Эрчим хүчний зохицуулах хороо (ЭХЗХ)-ны дарга А.Тлейхан өнөөдөр мэдэгдлээ.
Тэрээр, цахилгаан, дулааны үнэ тариф 10 дугаар сараас 2 дахин нэмэгдэнэ гэсэн мэдээллийг няцааж, “Энэ онд цахилгаан болон дулааны эрчим хүчний үнэ тарифт ямар нэг өөрчлөлт ороогүй. “COVID-19”-ийн цар тахлын улмаар бэлэн байдлын зэрэгт шилжсэн энэ онд эрчим хүчний хэрэглээ 6.7 хувиар буурч, тусгай зөвшөөрөл эзэмшигч үйлдвэр, ААН, компаниудын санхүү, эдийн засгийн байдал хүндэрч байна.
Гэвч эрчим хүчний салбарт хэрэглэгч нараа дээдэлсэн бодлого хэрэгжүүлж, үнэ тарифыг нэмэхгүйгээр салбарын хэмжээнд дотоод нөөц бололцоог ашиглан хэмнэлтийн горимоор ажиллаж, хүндрэл, эрсдэлтэй нөхцөл байдлыг даван туулах шийдвэр гаргасан ажиллаж байна” гэв.
Эрчим хүчний салбар дахь алдагдлыг бууруулж, шаардлагатай хөрөнгийн эх үүсвэрийг бүрдүүлэхийн тулд:
- Өндөр үнэтэй импортын цахилгааныг багасгах,
- Өндөр өртөгтэй сэргээгдэх эрчим хүчний эх үүсвэрийн үүсгүүрүүдийг анх тариф батлах үеийн ачааллаар ажиллуулах,
- хямд үнэтэй эс үүсгүүрүүдийг илүү ачааллах,
- Эдийн засгийн нөхцөл байдал хүндэрч буйтай холбоотойгоор эрчим хүчний компаниудын тэвчиж болох зарим зардлыг бууруулж, хэмнэлт гарган ажиллахаар шийдвэрлэснийг мэдэгдлээ.
Цааш нь тэрээр хэлэхдээ, “Улсын хэмжээнд өнөөдрийн байдлаар 4.9 сая дулааны эрчим хүч хэрэглээд байна. Цахилгааны хэрэглээ төлөвлөсөн хэрэгцээнээсээ буурсан. Энэ нь цар тахалтай холбоотой гэж үзэж байна. Хэрэглээ буурсан болохоор орлого буурсан. Гэхдээ эхний 7 сарын байдлаар эрчим хүчний хэрэглээг хэвийн хангасан. Нэгэнт үйлдвэрлэл буурсан. Цахилгаан эрчим хүчийг үйлдвэрлэдэг 18 эх үүсвэр бий. Тэднийг хямд байлгах үүднээс үнэтэй цахилгааныг багасгах, хямд үнээр үйлдвэрлэж байгаа эх үүсвэрийг ачааллыг нэмэх бодлого барьж ажиллалаа.
Эхний 7 сарын байдлаар манай салбар 597 тэрбум төгрөгийн орлого оллоо. Гэсэн ч хөрөнгийн дутагдал, санхүүгийн байдал хүндрэлтэй байна. Урьдчилсан байдлаар 40-өөд тэрбум төгрөгийн алдагдал хүлээх тооцоо гарлаа. Энэ хөрөнгийн эх үүсвэрийг нийгэмд ачаалал өгөхгүйгээр шийдэхээр ажиллаж байна. Манай салбар хэмнэлтийн горимоор ажиллах болно’ гэв.
