Эрчим хүчний зохицуулах хороо (ЭХЗХ)-ноос өнөөдөр цахилгаан, дулааны үнэ тариф өөрчлөгдөж нэмэгдээгүй талаар мэдээлэх үеэр шөнийн тарифын хөнгөлөлтийн талаар мөн хөндлөө.
Агаарын бохирдлыг бууруулах зорилгоор Засгийн газрын шийдвэрээр 2017 оноос эхлэн шөнийн болон оройн цахилгааны тарифт хөнгөлөлт үзүүлж ирсэн. Энэ хөнгөлөлт 11 дүгээр сарын 1-нээс хэрэгжинэ.
Өнгөрсөн жил хөнгөлөлтөд 160 орчим мянган орчим хэрэглэгч хамрагдсанаас 120 мянга орчим нь Улаанбаатар хотын иргэд байжээ. Шөнийн тарифын хөнгөлөлтөд мөн өнгөрсөн жил 11.6 тэрбум төгрөг зарцуулсан бол энэ жил үүнээс хоёр дахин их буюу 23.2 тэрбум төгрөг зарцуулах урьдчилсан тооцоо гарчээ.
Цахилгааны шөнийн хөнгөлөлтийг өдөр, шөнийн тарифт, баталгаат тоолууртай хэрэглэгч эдэлнэ.
-Нийслэлд гэр хорооллын айл өрх хөнгөлөлтийн тарифт хамрагдах гэхээр цахилгааны төлбөрөө бүрэн төлөөгүй дутуу байна, баталгаат тоолууртай байх ёстой гэсэн олон шаардлага тавьдагаас иргэд шөнийн тарифын хөнгөлөлтийг эдэлж чадахгүй байна. Энэ талаар хэрэглэгчид рүү хандсан, зөв хэрэглээг хэрэгжүүлж, чирэгдэлгүй үйлчлэх талаар юу хийж байна вэ? гэсэн асуултад ЭХЗХ-ны газрын дарга Б.Болор-Эрдэнэ:
-Цахилгаан эрчим хүчний үйлчилгээний үнийг өдөр, шөнийн тарифаар хөнгөлж байгаа. Нийслэлийн бүсэд оршиж буй гэр хорооллын айл өрх өдөр, шөнийн тарифт, баталгаат тоолууртай л байх ёстой. Ганцхан ийм шаардлага тавьж байгаа гэж хариулав.
