Австралийн умард нутгийн алслагдсан хэсэгт 4,4 метр урт давстай усны аварга том матар барьжээ. Уг матар нь 350 кг жинтэй бөгөөд Флора Ривер цэцэрлэгт хүрээлэнгээс өнгөрсөн долоо хоногийн баасан гарагт ойн цагдаа нар олсон байна.
Умард мужийн аялал жуулчлалын газрын албанаас ойрын жилүүдэд ийм том хэмжээтэй матар баригдсан тохиолдол бүртгэгдээгүй гэжээ. Аварга матрыг матрын аж ахуй руу явуулж үржүүлгэнд ашиглах юм байна.
Хамгийн сүүлд 2018 оны долдугаар сард далайн эргийн ойролцоо Кэтрин голд гацсан 4,7 метр урт матрыг олж байжээ. Давстай усанд амьдардаг матар нь дэлхий дээр амьдардаг хамгийн том хэвлээр явагч амьтан юм. Нас биед хүрсэн эрэгчин нь долоон метр урт, нэг тн жин хүрдэг байна. Тэд далайн эрэгтэй ойролцоо давсархаг, бохир усанд ихэвчлэн амьдардаг ажээ.
Эх сурвалж: CNN
