Дуучин, МУСТА Баярын Болд дуучин Б.Гүрбадамыг зодож, биед нь хүнд гэмтэл учруулсан хэргээр шүүхээс ял сонсчээ.
Нэхэн сануулахад уг хэрэг 2020 оны 05 дугаар сарын 15-ны өдөр нийтийн дуучдын 15 жилийн ойн тоглолтын бичлэг хийх үеэр Баянзүрх дүүргийн 11 дүгээр хорооны нутаг дэвсгэрт үйл ажиллагаа явуулдаг “Скай Ресорт” цанын баазын Хүн театр төвд болжээ. Энэ үеэр Б.Гүрбадам Х.Мөнгөнцэцэгийг айл гэр үймүүлсэн гэх зэргээр ярьсан нь МУСТА, дуучин Б.Болдын уурыг хүргэж Б.Гүрбадамыг мөргөж хамрыг нь хугалсан байна.
Дуучин Б.Болдод Эрүүгийн хуулийн 11.6.1-д зааснаар эрүүгийн хэрэг үүсгэн шалгаад 2020.06.29-ны өдөр Баянзүрх дүүргийн Эрүүгийн хэргийн анхан шатны шүүхээр хэлэлцээд түүнийг анх удаа гэмт хэрэг үйлдсэн, хувийн байдал, гэмт хэрэг үйлдсэн гэм буруугаа хүлээн зөвшөөрч байгаа байдал зэргийг харгалзан торгох ял оногдуулж, хэсэгчлэн төлүүлэх нь зүйтэй гэж шүүхээс үзжээ.
Тодруулбал, МУСТА, дуучин Баярын Болдыг хүний эрүүл мэндэд хөнгөн хохирол санаатай учруулах гэмт хэрэг үйлдсэн гэм буруутайд тооцож, Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар шүүгдэгч Б.Болдыг зургаан зуун далан таван нэгжтэй тэнцэх хэмжээний буюу 675.000 төгрөгөөр торгох ялаар шийтгэсэн байна.
