Авлигатай тэмцэх газар-ын Мөрдөн шалгах хэлтсээс шалгаж, шүүхэд шилжүүлсэн эрүүгийн хэргийг Сүхбаатар, Баянзүрх, Чингэлтэй дүүргийн Эрүүгийн хэргийн анхан шатны шүүхээр хянан шийдвэрлэсэн байна.
Тодруулбал, “М” компанийн менежер Т нь 2025 оны арваннэгдүгээр сард компанид холбогдох зөрчлийн хэргийг өөрт ашигтай байдлаар шийдвэрлүүлэх, татвар төлөхөөс зайлсхийх зорилгоор Чингэлтэй дүүргийн Татварын хэлтсийн Захиргаа, хуулийн тасгийн дарга З.Оргил-д 5500 ам.доллар буюу 20 сая төгрөгийн хахууль санал болгосон байна. Тэрбээр уг мөнгийг цагаан өнгийн дугтуйнд хийж, албан өрөөнд нь ширээн дээр тавьжээ.
Харин албан тушаалтан З.Оргил нь Авлигын эсрэг хуулийн 8 дугаар зүйлийн 8.1 дэх хэсэгт заасны дагуу уг үйлдлийг даруй Авлигатай тэмцэх газар-т мэдээлсэн байна. Үүний дагуу тус газраас эрүүгийн хэрэг үүсгэн шалгаж, хэргийг прокурорт шилжүүлжээ.
Улмаар Сүхбаатар, Баянзүрх, Чингэлтэй дүүргийн Эрүүгийн хэргийн анхан шатны шүүх 2026 оны хоёрдугаар сарын 12-ны өдрийн хуралдаанаар уг хэргийг хэлэлцэж, иргэн Т-ийг Эрүүгийн хуулийн тусгай ангийн 22.5 дугаар зүйлийн 1 дэх хэсэгт зааснаар гэм буруутайд тооцсон байна. Ингэхдээ түүнд 3 сая төгрөгийн торгууль ногдуулжээ.
АТГ-аас мэдээлснээр, тус газар нь төрийн байгууллага, албан тушаалтнуудад авлигын эсрэг сургалт, урьдчилан сэргийлэх үйл ажиллагааг тогтмол зохион байгуулж, авлигын эрсдэлийг бууруулах, шударга байдлыг төлөвшүүлэх чиглэлээр ажиллаж байна. Энэ удаагийн тохиолдолд албан тушаалтан хуульд заасан үүргээ биелүүлж, авлигын үйлдлийг таслан зогсооход чухал хувь нэмэр оруулсан гэж онцолжээ.
Сэтгэгдэл бичих