УИХ-аас Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн төслийг баталсан. Уг хуулиар газрын тосны бүтээгдэхүүн импортлогч аж ахуйн нэгжүүдэд шатахууны хангамжийн тогтвортой байдлыг хангахад шаардлагатай нөөцийг бүрдүүлэх, Монгол Улсын газрын тосны бүтээгдэхүүний нэг сар буюу 30 хоногоос доошгүй хэрэглээний нөөцийг хадгалах агуулах барихад шаардагдах хөнгөлөлттэй санхүүжилтийг олгох асуудлыг зохицуулах юм. Энэ хүрээнд аж ахуйн нэгжүүдэд шатахуун нөөцлөх сав барихад зээлийн хүүгийн хөнгөлөлт үзүүлэх асуудлаар Аж үйлдвэр, эрдэс баялгийн яамнаас Монголбанк болон арилжааны банкны төлөөллүүдтэй уулзаж санал солилцлоо. Энэ үеэр салбарын яамнаас тодорхой шалгуур хангасан шатахуун импортлогч компаниудад хөнгөлөлттэй зээлийг Монголбанкны репо санхүүжилтээр болон арилжааны банкны эх үүсвэрүүдийг ашиглан арилжааны банкнуудаар дамжуулан олгох тухай дурдлаа.
Мөн Монголбанк, арилжааны банкнуудын зүгээс репо санхүүжилтээр аж ахуйн нэгжүүдэд аль болох хөнгөлөлттэй зээл олгохыг дэмжинэ гэдгээ илэрхийлсэн бөгөөд Аж үйлдвэр эрдэс баялгийн яамыг аж ахуйн нэгжүүдтэй уулзах, нэгдсэн мэдээллээ явуулах зэргээр хамтран ажиллах саналаа дэвшүүлсэн билээ. Энэ тухайд Аж үйлдвэр эрдэс баялгийн дэд сайд Б.Энхтүвшин “Аж үйлдвэр эрдэс баялгийн яамны зүгээс аль болох аж ахуйн нэгжүүддээ чирэгдэл багатай, банкнуудад дарамт болохгүйгээр аль аль талын эрх ашгийг хангаж хурдан хугацаанд шатахуун нөөцлөх саваа барьж байгуулах сонирхолтой байна. Монгол Улсад хаврын тариалалт болон намар ургац хураалтын үеэр ачаалал ихэсдэг. Мөн сүүлийн жилүүдэд шатахууны хэрэглээ эрс нэмэгдсэн, олон улсын геополитикийн хурцадмал асуудал намжих төлөвгүй байгаа учир шатахуун нөөцлөх саваа товлосон хугацаандаа хурдан барих хэрэгцээ шаардлага бий.” гэлээ.
Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хууль нь олон улсын худалдааны нөхцөл байдал, гадаад хүчин зүйлээс сэргийлэх, стратегийн ач холбогдол бүхий бүтээгдэхүүний хангамж, нийлүүлэлтийг дэмжих, учирч болзошгүй эрсдэлийг бууруулах, даван туулах арга замыг тодорхойлох, холбогдох шийдвэрийг шуурхай гаргах нөхцөлийг бүрдүүлэх зорилготой.
Сэтгэгдэл бичих