Дэлхийд ойртож буй 2025 PM2 нэртэй астероидын тухай мэдээлэл сүүлийн үед олон улсын анхаарлыг татаж байна. АНУ-ын Сансар судлалын байгууллага (NASA)-ын мэдээлснээр уг астероид 2025 оны наймдугаар сарын 27-нд Дэлхийтэй хамгийн ойр зайгаар өнгөрөх боловч манай гаригтай мөргөлдөх ямар нэгэн аюулгүй гэдгийг албан ёсоор мэдэгдсэн байна.
Эрдэмтдийн тооцоолсноор 2025 PM2 астероид нь ойролцоогоор 58 метр орчим өргөнтэй бөгөөд цагт 66 мянга гаруй километрийн хурдтай сансарт хөдөлж байгаа аж. Тус астероид Дэлхийгээс ойролцоогоор 3.7 сая километр буюу 2.31 сая милийн зайд өнгөрөх бөгөөд сансар судлалын хэмжүүрээр харьцангуй ойр зайд тооцогддог байна. Харьцуулбал Сар Дэлхийгээс дунджаар 384 мянган километрийн зайд оршдог бөгөөд уг астероид Сарнаас ойролцоогоор арав дахин хол зайд өнгөрөх юм.
NASA-гийн тодорхойлсноор астероидыг аюултай ангилалд оруулахын тулд хоёр үндсэн шалгуур байдаг. Нэгдүгээрт, тухайн сансрын биет Дэлхийд 7.4 сая километрээс дотогш зайд ойртсон байх, хоёрдугаарт 85 метрээс дээш хэмжээтэй байх шаардлагатай. Харин 2025 PM2 астероид нь хэмжээний хувьд энэ босгоос бага тул одоогоор аюултай ангилалд багтахгүй байгаа юм.
Гэсэн хэдий ч ийм хэмжээний астероид Дэлхийд ойртож байгаа нь сансрын орчныг тогтмол ажиглах шаардлагатайг дахин харуулж байна гэж судлаачид онцолж байна. Сансрын агентлагууд ойрын жилүүдэд Дэлхийд ойртож болзошгүй астероидуудыг илрүүлэх, судлах ажлыг эрчимжүүлж байгаа бөгөөд олон улсын хамтын ажиллагаа ч нэмэгдэж байна.
Мэргэжилтнүүдийн үзэж байгаагаар том хэмжээний астероидын мөргөлдөөн маш ховор тохиолддог боловч сансрын биетийн хэмжээ, хурднаас шалтгаалан үзүүлэх нөлөө ихээхэн ялгаатай байдаг аж. Иймээс Дэлхийд ойртож буй биетүүдийг урьдчилан илрүүлэх, хөдөлгөөнийг нь тооцоолох судалгаа хүн төрөлхтний аюулгүй байдлын чухал чиглэл хэвээр байна.
Эх сурвалж: NASA, олон улсын сансар судлалын мэдээлэл
Сэтгэгдэл бичих