Пхеньянд Солонгосын Хөдөлмөрийн намын 9-р их хурал өндөрлөлөө. Ерөнхий нарийн бичгийн дарга Ким Жон Ун ажлын товч тайландаа цөмийн хүчийг бэхжүүлэх, БНАСАУ-АНУ-ын харилцаа, БНАСАУ-БНСУ-ын харилцааны талаар хамгийн сүүлийн үеийн мэдэгдлүүдийг хийв.
Ким Жон Ун тайландаа өөрийгөө хамгаалах, дайн байлдааны чадавхийг тасралтгүй өргөжүүлж бэхжүүлэх нь БНАСАУ-ын үндэсний батлан хамгаалах бодлого, зүй ёсны үндэсний батлан хамгаалах стратеги гэж мэдэгджээ. Цөмийн хүчийг цаашид өргөжүүлж, бэхжүүлж, цөмийн улсын статусаа бүрэн хэрэгжүүлэх нь БНАСАУ -ын гуйвшгүй хүсэл зориг юм.
Ким Жон Ун Ази, Номхон далайн бүс нутагт АНУ-ын тэргүүлсэн түрэмгийлэгч бүлгийн өргөжин тэлж, хэм хэмжээнээс хэтэрсэн цэргийн үйл ажиллагаа нь Солонгосын хойг болон бүс нутгийн аюулгүй байдалд ноцтой заналхийлж байна гэж мэдэгдэв. БНАСАУ АНУ-ын эсрэг гуйвшгүй хатуу бодлогоо баримтлах болно гэжээ.
Түүнчлэн хоёр Солонгосын харилцааны талаар хэлэхдээ, БНСУ-тай байх харилцааг улс орны хоорондох хамгийн дайсагнасан харилцаа гэж үзэж буй бөгөөд энэ нь БНАСАУ-ын өөрчлөгдөшгүй зарчимт байр суурь болно гэж мэдэгдэв.
Сэтгэгдэл бичих