Ховдод төрсөн эцэг хүүгээ зодож хөнөөгөөд цогцсыг нь булсан хэрэг илрэв

Ховд аймгийн Буянт суманд оршин суугч иргэн Г нь 2022 онд сураггүй алга болсон хэрэгт холбогдуулан цагдаагийн байгууллагаас мөрдөн шалгах ажиллагаа явуулж, уг хэргийн нөхцөл байдлыг тогтоожээ. Мөрдөн шалгах ажиллагааны явцад сураггүй алга болсон иргэн Г нас барсан болохыг тогтоож, цогцсыг нь олсон байна. Шалгалтаар талийгаачийн төрсөн эцэг, 41 настай иргэн Б нь 2022 онд хувийн таарамжгүй харилцааны улмаас хүүгээ зодож амь насыг нь хохироосон болох нь тогтоогджээ. Мөн тэрбээр үйлдсэн хэргээ нуун дарагдуулах зорилгоор эхнэрээ айлган сүрдүүлж, найз болон хүргэн нартайгаа үгсэн тохиролцон хүүгийнхээ цогцсыг нууж булсан нь мөрдөн шалгалтаар илэрсэн байна. Уг хэргийг хууль хяналтын байгууллага үргэлжлүүлэн шалгаж байгаа аж.