Израиль–Газын мөргөлдөөн үргэлжилж буй энэ үед Газын зурваст энгийн иргэдийн амьдрал улам хүндэрсээр байгааг олон улсын хэвлэлүүд онцолж байна. Сүүлийн өдрүүдэд агаараас өгсөн цохилтын дараа нурсан орон сууц, сүйдсэн дэд бүтцийн дор гэр бүл, ойр дотныхныхоо сураг чимээг хайсан хүмүүсийн эмгэнэлт дүр зураг олон нийтийн анхаарлыг татлаа.
Орон нутгийн оршин суугчдын ярьснаар зарим айл өрх гэр орон, эд хөрөнгө төдийгүй гэр бүлийн гишүүдээ алдаж, нурангинд үлдсэн дурсамж, эд зүйлсээ цуглуулж амьдралаа шинээр эхлэхээс өөр аргагүй байдалд хүрчээ. Аврах ажиллагаа үргэлжилж байгаа ч цахилгаан, усан хангамж, эмнэлгийн үйлчилгээ тасалдсан хэвээр байгаа нь нөхцөл байдлыг улам хүндрүүлж байна.
Хүмүүнлэгийн байгууллагуудын мэдээлснээр Газын зурваст орон гэргүй болсон иргэдийн тоо нэмэгдэж, түр байр, хүнс, эмнэлгийн тусламжийн хэрэгцээ огцом өссөн байна. Нэн ялангуяа хүүхэд, өндөр настан, хөгжлийн бэрхшээлтэй иргэд хамгийн эмзэг бүлэгт тооцогдож буйг онцолжээ.
Шинжээчид мөргөлдөөн удаашрах тусам энгийн иргэдэд учрах сэтгэлзүйн болон нийгмийн хор уршиг гүнзгийрч, бүс нутгийн тогтворгүй байдал урт хугацаанд үргэлжлэх эрсдэл нэмэгдэж байгааг анхааруулж байна. Олон улсын хамтын нийгэмлэг хүмүүнлэгийн тусламжийг нэмэгдүүлэх, гал зогсоох яриа хэлэлцээг сэргээх шаардлагатайг дахин сануулсаар байгаа ч газар дээрх нөхцөл байдал одоогоор тогтворжоогүй хэвээр байна.Газын Эрүүл мэндийн яамнаас өгсөн хамгийн сүүлийн мэдээллээр энэ мөргөлдөөн эхэлснээс хойш 72 000 гаруй хүн нас барсан гэж бүртгэгджээ (хохирогчдын тоо өдөр бүр өөрчлөгдөж байна.
эх сурвалж: CNA
Сэтгэгдэл бичих