Хонконгийн нэрт бизнесмен, хэвлэл мэдээллийн магнат бөгөөд ардчиллын төлөө тэмцэгч Жимми Лайд шүүхээс 20 жилийн хорих ял оноосон тухай олон улсын хэвлэлүүд мэдээллээ. Түүнд үндэсний аюулгүй байдлын тухай хуулийг зөрчсөн, гадаадын хүчинтэй хуйвалдсан, өдөөн турхирсан агуулгатай материал нийтэлсэн зэрэг хэд хэдэн зүйл ангиар буруутган ял оноосон байна.
78 настай Жимми Лай нь Хонконгийн ардчиллын хөдөлгөөний бэлгэ тэмдэгт тооцогддог бөгөөд өдгөө хаагдсан “Apple Daily” сонины үүсгэн байгуулагч юм. Тус хэвлэл нь Бээжингийн бодлогыг шүүмжилдэг байр сууриа ил тод илэрхийлдгээрээ танигдсан байв. Түүнийг холбогдох хэрэг 2025 онд шүүхээр хэлэлцэгдэж, улмаар энэ оны эхээр эцсийн шийдвэр гарчээ.
Шүүхийн шийдвэр олон улсын түвшинд хүчтэй шүүмжлэл дагуулж байна. АНУ, Их Британи, Европын холбоо болон хүний эрхийн байгууллагууд уг ялыг “улс төрийн өнгө аястай”, “хэвлэлийн эрх чөлөөг боомилсон алхам” хэмээн тодорхойлсон бол НҮБ-ын зарим шинжээчид өндөр настай хүнд ийм хэмжээний ял оноосныг “хэт хатуу шийтгэл” гэж үзэж буйгаа илэрхийлжээ.
Харин Хонконгийн эрх баригчид болон БНХАУ-ын албаныхан шүүхийн шийдвэрийг өмгөөлж, “үндэсний аюулгүй байдлыг хангах, хууль дээдлэх зарчмыг сахиулах хүрээнд гарсан шийдвэр” хэмээн мэдэгдсэн байна.
Сэтгэгдэл бичих