Сургуулийн улирлын амралт дуусаж, хичээл эхэлсэнтэй холбоотойгоор замын хөдөлгөөний эрсдэл нэмэгдэж байгааг цагдаагийн байгууллага анхааруулж байна. Сүүлийн өдрүүдэд Сүхбаатар, Хан-Уул дүүргийн нутаг дэвсгэрт сургуулийн орчимд явган хүний гарцаар гарч явсан 10–15 насны хоёр хүүхэд автомашинд мөргүүлсэн гэх дуудлага, мэдээлэл бүртгэгдэн шалгагдаж байгаа юм.
Улсын хэмжээнд 2025 онд хүүхэд өртсөн 1230 зам тээврийн осол бүртгэгдэж, үүний улмаас 67 хүүхэд амь насаа алдаж, 991 хүүхэд гэмтсэн статистик гарчээ. Энэ нь хүүхэд замын хөдөлгөөнд оролцох үед хамгаалалт, анхаарал хангалтгүй байгааг харуулж буй ноцтой тоо юм.
Монгол Улсын Замын хөдөлгөөний дүрмийн 16 дугаар зүйлд:
“Явган хүний зохицуулдаггүй гарц руу ойртон ирсэн жолооч хурдаа хасаж, уг гарцаар гарч байгаа болон гарахаар завдаж байгаа явган зорчигчид зогсож зам тавьж өгнө” гэж заасан байдаг.
Иймд жолооч нар сургуулийн орчимд хурдаа бууруулах, явган хүний гарц дээр бүрэн зогсож зам тавьж өгөх, хүүхэд багачуудыг зам хөндлөн гарах үед онцгой анхааралтай ажиглах шаардлагатайг цагдаагийн байгууллагаас анхааруулж байна. Мөн эцэг эх, асран хамгаалагчид хүүхдүүддээ замын хөдөлгөөний дүрмийг тогтмол сануулж, гарцаар зөв нэвтрэх дадал хэвшүүлэх нь ослоос урьдчилан сэргийлэх чухал алхам юм.
Сэтгэгдэл бичих