Ерөнхийлөгч У.Хүрэлсүх өнөөдөр /2026.01.26/ Улсын Их Хурал-ын дарга Н.Учрал, Монгол Ардын Нам-ын Ерөнхий нарийн бичгийн дарга Я.Содбаатар, Засгийн газрын гишүүд, түүнчлэн зарим төрийн өмчит компани, агентлагийн дарга нарыг өрөөндөө дуудан хуралдсан талаар бид өмнө нь мэдээлсэн.
Уг уулзалтад оролцсон Б.Чойжилсүрэн, Г.Дамдинням нар хурлын дараа сэтгүүлчдэд өгсөн мэдээлэлдээ “Ерөнхийлөгчид холбогдох мэдээллийг танилцуулж, салбарын хүрээнд тулгамдаж буй асуудлуудын талаар ярилцсан” хэмээн тайлбарласан юм. Тодруулбал, эрчим хүчний салбарын өнөөгийн нөхцөл байдал, хэрэгжиж буй бодлого, цаашдын шийдлүүдийн талаар мэдээлэл өгсөн гэдгээ онцолжээ.
Хурлын өмнө улс төрийн хүрээнд уг уулзалтаар салбар хариуцсан сайд нарт хариуцлага тооцох, зэмлэх асуудал хөндөгдөж магадгүй гэх мэдээлэл яригдаж байсан ч бодит байдал дээр тийм агуулга огт хэлэлцэгдээгүй байна. Харин уулзалтын гол зорилго нь төрөөс хэрэгжүүлж буй стратегийн томоохон төслүүдийн явц, зохион байгуулалтын асуудалд анхаарах байсан аж.
Тодруулбал, Ерөнхийлөгч У.Хүрэлсүх Хавдрын шинэ эмнэлэг барих төсөл болон Шинэ Хархорум хот байгуулахтай холбоотой ажлын хэсгийнхнийг хүлээн авч уулзан, хэрэгжилтийн явц, тулгамдаж буй асуудал, цаашдын төлөвлөгөөний талаар дэлгэрэнгүй мэдээлэл сонссон байна. Тэрбээр эдгээр төслийг улс орны урт хугацааны хөгжил, иргэдийн эрүүл мэнд, амьдралын чанарт чухал нөлөөтэй гэдгийг онцолж, ажлыг төлөвлөсөн хугацаанд, чанартай гүйцэтгэх шаардлагатай гэдгийг сануулжээ.
Ийнхүү өнөөдрийн уулзалт нь хариуцлага тооцох улс төрийн шинжтэй хуралдаан бус, харин төрийн бодлогын томоохон бүтээн байгуулалтын төслүүдийн явцыг нягтлах, уялдаа холбоог сайжруулах зорилготой байсан нь тодорхой болж байна.
Сэтгэгдэл бичих