Замын хөдөлгөөний удирдлагын төв, Тээврийн цагдаагийн алба хамтран 2025 оны есдүгээр сараас иргэд зөрчлийн мэдээллийг илгээж, хяналт тавих боломжтой “102 Police” аппликейшныг хэрэглээнд нэвтрүүлсэн. Тус аппликейшнаар дамжуулан иргэд, нийтийн эзэмшлийн зам талбай, зогсоолын бус газар, явган хүний зам, хайс хашлага давуулан тээврийн хэрэгслээ байршуулсан зөрчлийг ТЦА-нд мэдээлэх боломжтой болсон. Зөрчил, мэдээлэл илгээсэн иргэд тухайн тээврийн хэрэгслийн торгуулийн 10-20 хувийн урамшууллыг улирал тутамд олгохоор болсон юм.
Энэ талаар ЗХУТ-ийн хэвлэл мэдээлэл олон нийттэй харилцах мэргэжилтэн Л.Баярцэцэгээс тодруулахад “Гэмт хэргээс урьдчилан сэргийлэх тухайн хуулийн 34 дүгээр зүйлд гэмт хэрэг, зөрчлөөс урьдчилан сэргийлэх ажилд идэвхтэй оролцсон иргэн, хуулийн этгээдийг 20 хүртэлх хувиар урамшуулж болохыг заасан байдаг.
2025 оны арваннэгдүгээр сарын 1-ний өдрөөс арванхоёрдугаар сарын 31-ний хооронд нийт 126,769 зөрчил мэдээлэл ирүүлсэн. Тухайн өдөрт багтаж төлбөр төлөгдсөн 62,886 зөрчил байсан. Ингэхдээ зөрчил илгээсэн 9112 иргэн урамшуулал авах бөгөөд нийт 143 сая төгрөг олгохоор төлөвлөлөө.
Мөн арванхоёрдугаар сарын эхний урамшууллыг 9112 иргэнд олгох бөгөөд “102 Police” аппликейшнд өнөөдрийн байдлаар 5100 гаруй иргэн дансаа холбосон байна. Үлдсэн 3000 гаруй иргэн дансаа холбоогүй гэх мэдээлэл бий. Өнөөдрийн /2025.01.20/ 09:00 цагийн байдлаар урамшуулал олгох систем хаагдсан учраас дансаа холбоогүй иргэдэд дараагийн улиралд нөхөн олгох юм. Мөн дансаа “102 Police” аппликейшнд холбосон 5000 гаруй иргэнд 72 цагийн дотор багтааж урамшууллыг олгоно. Үүнээс гадна Хууль зүй, дотоод хэргийн сайд, Сангийн сайдын хавсарсан 2023 оны тавдугаар сарын 26-ны өдрийн А/183, А/112 тушаалын хавсралтыг үндэслэн урамшуулал авч буй иргэдээс 10 хувийн хүн амын орлогын албан татвар авахаар тусгасан учир иргэд мэдэх эрхтэй юм.
Мөн тухайн тээврийн хэрэгслийн жолооч торгуулиа бүрэн төлсөн тохиолдолд зөрчил, мэдээлэл илгээсэн иргэнд 10-20 хувийн урамшуулал бодогдох юм. Зарим тохиолдолд зөрчил мэдээлэл давхар илгээсэн иргэдийн “102 Police” аппликейшнд ямар шалтгааны улмаас баталгаажаагүй гэх мэдээллийг илгээж байгаа” гэлээ.
ЭХ СУРВАЛЖ:NEWS.MN
Сэтгэгдэл бичих