Монголбанк-ны Мөнгөний бодлогын хороо 2026 оны 1 дүгээр сарын 16-ны өдөр ээлжит бус хуралдаан хийж, хэрэглээний зээл болон банкуудын заавал байлгах нөөцтэй холбоотой чухал зохицуулалтын шийдвэрүүдийг гаргалаа.
Хурлаар банкнаас иргэдэд шинээр олгох болон нөхцөлийг нь өөрчлөх хэрэглээний зээлийн өр, орлогын харьцааны дээд хязгаарыг 45 хувь болгон шинэчлэн тогтоохоор шийдвэрлэв. Мөн банкуудын төгрөгийн болон гадаад валютын заавал байлгах нөөцийн хувь хэмжээг тус бүр 1 нэгж хувиар нэмэгдүүлж, харгалзан 14 хувь, 19 хувь болгохоор тогтоосон байна.
Монголбанкнаас мэдээлснээр, мөнгөний хатуу бодлого хэрэгжиж байгаа хэдий ч банкны систем дэх зээлийн өсөлт өндөр түвшинд хадгалагдсаар байгаа аж. Тодруулбал, 2025 оны 11 дүгээр сарын байдлаар зээлийн нийт үлдэгдэл өмнөх оны мөн үетэй харьцуулахад 21 хувиар өссөн үзүүлэлттэй байна.
Хэрэглээний зээлийн огцом өсөлт нь эрэлтийн шалтгаантай инфляцыг өдөөх, бизнесийн зээлд чиглэх санхүүжилтийг хумих, цаашлаад хэрэглээний импорт нэмэгдэж, төгрөгийн ханш болон төлбөрийн тэнцэлд дарамт үүсгэх эрсдэлтэй гэж үзэж байна. Үүнээс гадна гадаад эдийн засгийн орчин тодорхой бус хэвээр байгаа энэ үед банкны системийн эрсдэл даах чадварыг нэмэгдүүлэх шаардлагатайг онцолжээ.
Иймд Мөнгөний бодлогын хорооноос инфляцыг дунд хугацаанд зорилтот түвшинд тогтворжуулах, эдийн засаг, санхүүгийн салбарын тогтвортой байдлыг хангах зорилгоор дээрх бодлогын шийдвэрүүдийг гаргасан байна. Цаашид макро эдийн засаг, санхүүгийн орчны төлөв хэрхэн өөрчлөгдөхөөс шалтгаалан бодлогын дараагийн алхмуудыг тухай бүр авч хэрэгжүүлэхийг Монголбанкнаас мэдэгдлээ.
Мөнгөний бодлогын хорооны энэхүү хуралдааны хураангуй тэмдэглэлийг хоёр долоо хоногийн дараа Монголбанкны албан ёсны цахим хуудсанд нийтлэх юм.
Сэтгэгдэл бичих