НИТХ-ын ээлжит V хуралдаанаар Тусгай бүсэд үйл ажиллагаа эрхлэх аж ахуй нэгжүүдийг урамшуулах, татварын бус дэмжлэг үзүүлэх үйл ажиллагааны журам батлах тухай асуудлыг хэлэлцэж баталлаа.
Хэлэлцэх асуудлын танилцуулгыг Нийслэлийн ерөнхий архитектор Ч.Төгсдэлгэр хийлээ. Тусгай бүсэд үйл ажиллагаа эрхлэх аж ахуй нэгжүүдийг урамшуулах, татварын бус дэмжлэг үзүүлэх үйл ажиллагааны журам нь нийслэлийн эдийн засгийн тусгай бүсэд үр дүнтэй, эдийн засагт ач холбогдол бүхий үйл ажиллагаа эрхэлж байгаа аж ахуйн нэгжийг урамшуулах, тэдгээрт татварын бус дэмжлэг үзүүлэх үйл ажиллагаатай холбоотой үүсэх харилцааг зохицуулах зорилготой гэдгийг тайлбарлалаа.
НИТХ-ын төлөөлөгч Б.Ану-Үжин “Хуулиас давсан журам байх ёсгүй. Татварын тухай хуультай хэр нийцэж байгааг тусдаа заалт болгож оруулах шаардлагатай харагдаж байна. Төрийн болон орон нутгийн өмчийн хөрөнгөөр бараа худалдан авах тухай хуульд нийцэж байгааг тусдаа тодорхой заалтаар оруулах хүсэлтэй байна. Аж ахуй нэгжүүдийг сонгон шалгаруулахдаа 90 хоногт багтаана гэсэн байна. Энэ хугацаа бизнес эрхлэгчдийн хувьд чанга тул уян хатан заалт оруулах хэрэгтэй байх” гэсэн саналыг хэллээ.
Дээрх журмын дагуу татварын бус ямар дэмжлэг үзүүлэх вэ?
- цахилгаан, дулаан, түрээсийн төлбөрийг тодорхой хугацаанд хөнгөлөх;
- тоног төхөөрөмжийн түрээсийн төлбөрийг хөнгөлөх;
- үйл ажиллагаатай нь холбоотой газрыг эзэмшүүлэх, ашиглуулах;
- бизнес эрхлэхэд шаардагдах баримт бичиг, зөвшөөрөл, шаардлагуудыг хялбаршуулах;
- хөнгөлөлттэй зээл олгох, хүний нөөцийнх нь чадавхыг нэмэгдүүлэх;
- гадаадаас авах ажиллах хүч, мэргэжилтний тоо, хэмжээг нэмэгдүүлэх, ажлын байрны төлбөрөөс чөлөөлөх;
- экспортод чиглэсэн санхүүжилтэд батлан даалт гаргах;
- олон удаагийн орж гарах виз болон байнга оршин суух зөвшөөрөл олгох;
- бүтээгдэхүүн, ажил, үйлчилгээний борлуулалтад худалдан авалтаар дэмжлэг үзүүлэх;
- бизнесийн зөвлөх үйлчилгээ үзүүлэх;
- техник, технологи дамжуулах, нутагшуулах, үйлдвэрлэлд нэвтрүүлэхэд дэмжлэг үзүүлэх;
- үйл ажиллагааг нь сурталчлах, дотоодын болон ОУ-ын үзэсгэлэнд оролцох зардлаас чөлөөлөх;
- тухайн бүс доторх нийтийн тээврийн хураамжаас чөлөөлөх гэх мэт.
Сэтгэгдэл бичих