Зэвсэгт хүчний Жанжин штабын даргын 2025 оны “Цэрэг халах, татах ажлыг зохион байгуулах тухай”, Дотоодын цэргийн командлагчийн 2025 оны “Хугацаат цэргийн алба хаагчдыг бэлтгэлээр халах тухай” тушаалын хэрэгжилтийг хангах зорилгоор Дотоодын цэрэгт 2024 оны хоёрдугаар ээлжийн цэрэг татлагаар татагдан ирж, хугацаат цэргийн алба хаах хугацаа дуссан түрүүч, байлдагч нарыг хугацаат цэргийн албанаас бэлтгэлээр халлаа.
Хугацаат цэргийн алба хаагчдыг бэлтгэлээр халах ёслолын арга хэмжээ өнөөдөр /2025.10.15/ Дотоодын цэргийн 05 дугаар ангийн байрлалд болов.
Арга хэмжээнд Дотоодын цэргийн штабын дарга, хурандаа М.Лувсандорж болон зөвлөлийн гишүүд, Дотоодын цэргийн 05, 805, 810 дугаар ангийн бие бүрэлдэхүүн оролцсон юм.
Дотоодын цэргийн штабын дарга, хурандаа М.Лувсандорж хэлсэн үгэндээ: “…Эзэн богд Чингис хааны хишигтэн цэргээс улбаатай, баатарлаг дайчдын уламжлал, түүхэн гавьяа болсон Дотоодын цэргийн байгууллагын уламжлалыг үргэлжлүүлсэн Та бүхнээр Монголын төр, ард түмэн бахархаж байна.
Та бүхэн нэг жилийн хугацаанд зөвхөн үүрэг гүйцэтгээгүй эцэг эхийнхээ итгэлийг, эх орныхоо нэр төрийг хамгаалсан, эр хүн болох замаа эхэлсэн, нөхөрлөлийн үнэ цэнийг ойлгосон онцгой цаг хугацааг туулсан гэдэгт итгэлтэй байна.
Эр цэргийн албаа нэр төртэй хаасан Та бүхнээр нутаг ус, аав ээж, ахан дүүс чинь бахархаж байна. Та бүхэн эх орончдын гал голомтыг бадрааж, ажил амьдралын гараагаа зорилго, итгэл дүүрэн эхлүүлж буйд чин сэтгэлээс баяр хүргэе.” хэмээв.
Сэтгэгдэл бичих