“Транспэрэнси Интернэшнл” байгууллагаас жил бүр авлигын төсөөллийн индексийг гаргадаг. Ингэхдээ дэлхийн 180 гаруй улсын төрийн байгууллагын авлигын түвшний үзүүлэлтээр нь үнэлгээ өгч эрэмбэлдэг аж.
Тус индексийг гаргахдаа Дэлхийн банк, Дэлхийн эдийн засгийн форум зэрэг нэр хүндтэй 13 институт, тинк танкуудын мэдээлэл судалгааг ашигладаг ба 6 бүлэг шалгуур үзүүлэлтээр үнэлдэг аж.
Харин Монгол Улсын хувьд 8 эх сурвалжаар үнэлэгдсэн бөгөөд авлигын төсөөллийн индекс болон бусад гол индексүүдийн 18-21 хувийг хууль эрх зүйн орчин болон макро эдийн засгийн үзүүлэлтүүд эзэлжээ. Тодруулбал, ДНБ, ДНБ-ний өсөлт, инфляци, ажилгүйдэл гэх мэт.
Мөн бизнесийн орчны үнэлгээ, ардчиллын олон талт байдал, өрсөлдөх чадвар, эрсдэлийн үнэлгээ гээд олон талын шалгуур үзүүлэлтийн дунджаар үнэлсэн байна. Түүнчлэн манай улсын хувьд бодлогын түвшинд байгалийн баялгийн үр өгөөж төвлөрүүлэх, хуваарилах, зарцуулах болон шийдвэр гаргахтай холбоотой мэдээлэл ил тод эсэх, төрийн худалдан авах ажиллагааны хууль, төрийн өмчит аж ахуйн нэгжүүдийн засаглал, ил тод байдлыг сайжруулах, хувийн өмчийг хамгаалах механизм үр дүнтэй эсэх зэрэг асуудлыг хөндөж дүгнэсэн байна.
Сэтгэгдэл бичих