“Эмээлт эко аж үйлдвэрийн парк”-ийг хөгжүүлэх ТЭЗҮ-г хүлээн авлаа

Өнөөдөр Нийслэл Улаанбаатар хотын захиалгаар Олон улсын санхүүгийн корпорацийн гүйцэтгэсэн “Эмээлт эко аж үйлдвэрийн паркийг хөгжүүлэх техник эдийн засгийн үндэслэл”-ийг хүлээн авлаа. Тус арга хэмжээнд Нийслэлийн засаг дарга бөгөөд Улаанбаатар хотын захирагч Х.Нямбаатар болон хотын удирдлагууд, Эмээлт эко аж үйлдвэрийн парк ХК-ийн гүйцэтгэх захирал Б.Мягмар, Дэлхийн банк, ОУСК-ийн төлөөлөл оролцлоо.

Ингэснээр Дэлхийн банкны хөнгөлөлттэй зээлээр хэрэгжих “Улаанбаатар хотын өрсөлдөх чадвар, нөхөн сэргээлтийг дэмжих төсөл”-ийн зээлийн хэлэлцээрийг Засгийн газар, УИХ-аар хэлэлцүүлж, амжилттай хэрэгжүүлэх боломж бүрдэж байна.

Эмээлт эко аж үйлдвэрийн паркийн эдийн засгийн гүйцэтгэл дэх санхүүгийн чадвар дээшилснээр дараах ашиг тусыг өгөх болно гэж гэж үзэж байна.

Үүнд:

– Паркийн хүрээнд 5600 тогтвортой ажлын байрыг шинээр бий болгоно.Цаашдаа Парк нь Аргалант-Эмээлт дагуул хотын эдийн засгийн тусгай бүсийн чиг үүрэгтэй хөгжих болно.

– Жижиг, дунд үйлдвэрийг (ЖДҮ) сурталчлах, орон нутгийн бизнес болон үйлдвэрүүдийн хоорондын уялдаа холбоо бий болгоход дэмжлэг үзүүлэн ажиллах болно.

– Эмээлт ЭАҮП-ийг хөгжүүлэх таатай орчин бүрдсэнээр арьс ширний чанар сайжирч, түүхий эдийн хаягдал багасч, арьс ширний экспортын эзлэх хувь, хэмжээ өснө. Экспортолсон арьс ширний тоог 2041 он гэхэд жилд өмнөх дээд хэмжээ буюу 7 сая-д хүргэж боловсруулах боломжтой болно гэж тооцоолж байна.

– Нийслэлийн Хан-Уул дүүргийн 20 дугаар хороонд үйл ажиллагааг явуулж буй арьс шир, ноос боловсруулах үйлдвэрүүдийг Эмээлт эко аж үйлдвэрийн парк руу нүүлгэн шилжүүлсэнээр Туул голын сав газрын бохирдсон хөрсийг нөхөн сэргээж, Улаанбаатар хотын 2040 оны ерөнхий төлөвлөлттэй уялдуулан дахин төлөвлөж Иргэд оршин суугчид, аж ахуйн нэгжүүдэд ээлтэй,ногоон байгууламж бүхий,нийгмийн цогц үйлчилгээг бүрдүүлсэн тохилог орчин бий болно.

– Ингэснээр Улаанбаатар хотын ялангуяа Хан-уулын дүүргийн иргэдийн амьдралын чанар сайжирч, цэвэр, аюулгүй орчинд амьдрах боломж бүрдэнэ гэж үзэж байна. Зээлийн хэлэлцээр соёрхон батлагдсанаар 2024 онд холбогдох худалдан авах ажиллагаануудыг зохион байгуулж, 2025 онд дэд бүтцийн бүтээн байгуулалтыг эхлүүлэн 2027 онд дуусгахаар төлөвлөж байна.