Цагаан сарын баярын өдрүүдэд нийслэлд хөл хорио тогтоож, хот хоорондын хөдөлгөөнийг хязгаарлана гэх мэдээлэл олон нийтийн сүлжээнд цацагдаад буй. Түүнчлэн халдварын тархалт нэмэгдэж, эмнэлгийн ачаалал ихэссэн учир цагаан сарын баярыг цахимаар тэмдэглэх, олон нийтийн арга хэмжээг хоёрдугаар сарыг дуустал хязгаарлахыг НОК УОК-оос хүссэн юм.
Харин УОК-ын зүгээс нийгэмд чиглэсэн, ард иргэдэд хандсан олон чухал ажлыг шуурхай зохион байгуулахад дэмжлэг үзүүлэхээ илэрхийлсэн.
Ийнхүү НОК-ын хүсэлтээр цагаан сарын өдрүүдэд хөл хорио тогтоох эсэхийг холбогдох эх сурвалжаас тодрууллаа.
УОК-ын Нэгдсэн шуурхай штабын дарга, бригадын генерал Б.Ууганбаяр “Одоогоор энэ сарын 24-нөөс хол хорио тогтооно гэх асуудал яригдаагүй. Гэхдээ халдварын тархалт нэмэгдэж байна. НОК цагаан сарыг цахимаар тэмдэглэх хүсэлт гаргасан. Үүний хүрээнд сар шинийн баярыг гэр бүлийн хүрээнд, цомхон тэмдэглэхийг ард иргэддээ уриална. Аймгуудын тухайд хот хоорондын хөдөлгөөнийг хязгаарлах эсэхээ өөрсдөө шийднэ. Тухайн нутаг дэвсгэртээ ямар хорио цээрийн дэглэм тогтоохоо аймгийн онцгой комисс шийдвэрлэнэ гэсэн үг” гэлээ.
Харин УОК-ын нарийн бичгийн дарга Т.Баярхүүтэй холбогдож дээрх асуудлыг тодруулахад ‘Мэдээлэл өгөх боломжгүй. Асуудал судлагдаж, шийдвэр гарсны дараа олон нийтэд албан ёсны мэдээлэл өгнө’ гэсэн юм.
Сэтгэгдэл бичих