Манай улсад Ковид19 халдварын омикрон хувилбар бүртгэгдэж, цар тахлыг дараагийн давлагаа эхэллээ. Энэ хувилбараар өвчилсөн иргэд харьцангуй хөнгөн шинж тэмдэгтэй байгаа талаар албаныхан мэдээлээд буй. Шинэ хувилбарын шинж тэмдэг болон эмчилгээний талаар мэргэжлийн хүмүүс юу хэлснийг түүвэрлэн хүргэж байна.
Оном сангийн ТУЗ-ийн дарга Д.Наранбаатар: Омикрон хүүхдэд илүү эрсдэлтэй
Ерөнхийдөө тухайн хүний өвчлөл, ямар үйлдвэрийн вакцинаар дархлаажуулсан эсэхээс хамаарч хүндрэлийн байдал дельта хувилбартай харьцуулахад 15-75 хувиар хөнгөн байгаа. Тэгсэн хэрнээ бага насны хүүхдүүдийн дунд өвчлөл хүндрэх эрсдэлтэй байгаа нь Англи, АНУ, Норвеги улсын судалгаанаас харагдаж байна. Энэ нь магадгүй бага насны хүүхдүүд цар тахлын эсрэг вакцинжуулалтад хамрагдаагүй байгаатай холбоотой.
Гуравдугаар төв эмнэлгийн захирал Ц.Төмөр-Очир: Омикроны үед өвөрмөц эмчилгээ хийхгүй
Эрүүл мэндийн сайдын тушаалаар эмнэл зүйн зөвлөх баг ажиллаж байгаа. Саяхан омикроны дэгдэлттэй холбоотойгоор цар тахлын халдварын эмчилгээ оношлогооны түр зааврыг шинэчилсэн. Өвөрмөц эмчилгээ хийхгүй. Өмнөх альфа, дельта хувилбаруудтай адилхан. Гэхдээ вирусийн гаралтай амьсгалын дээд замын халдварын үед ер нь антибиотик хэрэглэдэггүй. Цар тахлын дельта хувилбарын давлагааны үеэр хүмүүс богино хугацаанд уушгины хатгаа авч байсан учраас антибиотик хэрэглэж байсан.
ХӨСҮТ-ийн захирал Ц.Билэгmсайхан: Дөрөв дэх тун омикроноос хамгаална
Нийт иргэдийн 70-аас дээш хувь нь Сенофарм үйлдвэрийн Веросалл вакцинд хамрагдсан. Хоёр тун “Вероселл” вакцинд хамрагдсан иргэд 4-5 сарын дараа ‘Файзер’ вакцинаар нэмэлт тунгаа хийхэд 30 au/ml эсрэг биеийн титр 340 нэгж болж өссөн байсан. Одоо 4-5 сарын дараа 110 нэгж болж буурсан байна. Тиймээс дөрөв дэх тунг хийлгэвэл эсрэг биетийн хэмжээ өсөж, омикроноос таныг хамгаална.
Томуугийн үндэсний нэгжийн дарга А.Бурмаа: Омикроноос дархлаа, вакцин хоёр л хамгаална
Омикрон хувилбар нь халдварлах чадвар өндөртэй. Үүнээс хамгаалах гол зүйл нь сайн дархлаа. Мөн гурав, дөрөвдүгээр тундаа идэвхтэй хамрагдах хэрэгтэй байна. Вакцинд хамрагдсанаар эндэгдэл, хүндрэлээс сэргийлнэ. Гурван тун вакцинтай, дээрээс нь өвдөөд эдгэрсэн хүмүүс ч дахин халдвар авах тохиолдол байна. Вакцин болон өвдөөд эдгэхэд тогтсон дархлаа тодорхой хугацааны дараа буурч байгаа нь судалгаагаар нотлогдож байгаа юм. Тэгэхээр дөрөвдүгээр тундаа хамрагдах шаардлагатай. Бага насны хүүхдүүдийн дунд өвчлөл нэмэгдэж байна.
ЭМЯ-ны Эмнэлгийн тусламжийн газрын дарга Ж.Нарангэрэл: Омикрон хувилбарын хөнгөн хэлбэр 5-8 хоногт бүрэн эмчлэгдэнэ
Омикрон хувилбар томуу, томуу төст шинж тэмдгээр илэрдэг, уушгины хатгалгаа хэлбэрээр хүндрэх эрсдэлтэй. Томуугийн халдвар болон омикрон хувилбарын шинж тэмдэг нь ижил байна. Тиймээс ялгахад хүндрэлтэй байгаа. Түргэвчилсэн болон ПГУ шинжилгээ хийж байгаа. Омикрон хувилбарын хөнгөн хэлбэр нь 5-8 хоногт бүрэн эмчлэгдэх боломжтой. Хүнд хэлбэрийн шинж тэмдэгтэй байгаа тохиолдолд эмнэлэгт эмчилнэ. Энэ хувилбар нь маш олноор нэгэн зэрэг халдварлах чадвартай. Ихэвчлэн халуурах шинж тэмдэгтэй байна.
ХӨСҮТ-ийн Эрчимт эмчилгээний тасгийн эмч Ц.Чинбаяр: Халдвар авсан бүх иргэдийг омикроноор өвчилсөн гэж үзэхгүй
Цар тахлын өмнөх хувилбаруудаас ялгаатай онцгой шинж тэмдэг байхгүй. Халдвар авсан бүх иргэдийг омикрон хувилбараар өвчилсөн гэж үзэхгүй. Амьсгалын дээд замын шинж тэмдэг давамгайлж байгаа. Омикрон хувилбарын давлагаа хүн амын вакцинд хамрагдаагүй бага насны хүүхдүүдэд хүндрэх магадлалтай байна. Эмчилгээний арга барилын хувьд өмнөх хувилбараас шинэчлэгдсэн зүйл байхгүй.
Сэтгэгдэл бичих