Автомашин ачилтын компанийн ажилтан, жолооч нарын хооронд маргаан дэгдэж, нэгнээ мэсээр гэмтээсэн хэрэг өнөөдөр /2021.08.13/ гарчээ.
Хэргийн талаар цагдаагийн байгууллагаас тодруулахад “Хан-Уул дүүргийн 15 дугаар хороонд байрлах “Home Plaza” барилгын өмнөх автобусны буудал дээр …. улсын дугаартай автомашины жолоочид хутгалуулчихлаа” гэдэг дуудлага 10:56 цагт ачилтын компанийн ажилтнаас ирсэн.
Дуудлага, мэдээллийн дагуу цагдаагийн алба хаагчид очиж шалгалтын ажиллагаа явуулахад тухайн автомашины эзэн буюу хэрэгт холбогдогч 46 настай Н ачилтын компанийн ажилтан 22 настай Н-тай маргалдаж мэсээр гэмтээж, автомашинаа авсан байв. Хэргийг Хан-Уул дүүрэг дэх цагдаагийн газрын нэгдүгээр хэлтэст материалжуулан шалгаж байна” гэж мэдээллээ.
Тээврийн хэрэгслийг түр саатуулах, зөөж шилжүүлэх журмын 2.7-д:
Цагдаагийн албаны тухай хуулийн 34 дүгээр зүйлийн 34.1.1 дэх хэсэг, Зөрчлийн тухай хуулийн 14.7 дугаар зүйлийн 35, 37 дахь хэсэгт заасан үндэслэлээр тээврийн хэрэгслийг зөөж шилжүүлэхдээ дараах үйл ажиллагааг явуулна . Үүнд:
2.7.1.Тээврийн хэрэгслийг зөөж шилжүүлэхийн өмнө болон шилжүүлэхээр бэлтгэж байх /ивүүр, татлага, бэхэлгээ хийх/ явцад тухайн тээврийн хэрэгслийн жолооч /эзэмшигч, өмчлөгч/ ирвэл шийтгэл оногдуулж, тээврийн хэрэгслийг хүлээлгэж өгнө” гэж заажээ.
Сэтгэгдэл бичих