Нийслэл Бейрут хотод нь хүчтэй дэлбэрэлт болсны дараа Ливаны Засгийн газар огцорсон билээ. Тэгвэл тус улсын Засгийн газрын шинэ тэргүүнээр ХБНГУ-д Элчин сайдаар сууж байсан Мустафа Адиб тодорчээ. Түүнд Парламентын гишүүдийн дийлэнх нь итгэл хүлээлгэсэн байна.
М.Адибыг Ерөнхий сайд болсны дараа Францын Ерөнхийлөгч Э.Макрон шинэ бүрэлдэхүүнээ хурдан тодруулж, танхимаа эмхлэн байгуулахыг уриалжээ. Ливаны өндөр албан тушаалтнуудын ярьж байгаагаар, М.Адибыг Ерөнхий сайд болгоход Э.Макроны дэмжлэг тодорхой хэмжээгээр нөлөөлсөн гэнэ.
Бейрутын дэлбэрэлт наймдугаар сарын 4-нд болсон. Э.Макрон түүнээс хойш хоёр ч удаа Бейрутэд айлчлаад байна. Тэрээр өчигдөр орой Ливаны нийслэлд хөл тавьсан бөгөөд тус улсын өндөр албан тушаалтнуудтай ажил хэргийн уулзалтууд хийхээр төлөвлөжээ.
