Өнгөрсөн дөрөвдүгээр сарын 11-ны өдөр Малайз улсын цагдаагийн алба хаагч 30 настай Хазрул Хизам Монгол эмэгтэйчүүдийг эрх мэдлээрээ далайлган сүрдүүлж, хүчирхийлсэн хэрэг гарсан.
Малайзын Петалинг Жаяа хотын замын пост дээр ажиллаж байсан цагдаагийн алба хаагч Монгол улсын иргэн болох 20 болон 37 настай эмэгтэйчүүдийг саатуулж, 12:30-16:30 цагийн хооронд ‘PJ Luxe Boutique’ гэх зочид буудлын хоёр тусдаа өрөөнд хорин, хүчирхийлсэн хэрэг гарсан. Хохирогч бүсгүйчүүд Малайзад хууль бусаар амьдардаг байсан нь тэднийг сүрдүүлэх шалтгаан болсон байж болзошгүй гэж тус улсын хэвлэлүүдээр нийтлэж байна.
Энэхүү хэрэгт холбогдуулан Петаля Жаяагийн цагдаагийн дарга Ник Азинээ хэлэхдээ ‘Цагдаагийн алба хаагч өөрийн эрх мэдлийг ашиглан хүчирхийлэл үйлдэж, хүн барьцаалсан шинжтэй үйлдэл гаргасанд харамсаж байна’ хэмээн хэвлэлийн хурлын үеэр ярьсан юм. Гэвч түүнийг баривчилснаас долоо хоногийн дараа сулласан. Учир нь түүнийг мөрдөн байцаалтад идэвхтэй оролцож, хэргээ хүлээсэн гэх үндэслэлээр 27 мянган ринггитийн /18 сая орчим төгрөг/ барьцаатай, батлан даалтад гаргасан юм.
Өнгөрсөн зургадугаар сарын 2-ны өдөр хүчирхийлэл үйлдсэн Хазрул Хизамыг шүүх найм дахь удаагийн хурал болсон. Гэсэн ч түүний өмгөөлөгч болох Акмал Жусохын өөр нэгэн үйлчлүүлэгч коронавирусийн халдвар авсан тул шүүх хурлыг долдугаар сарын 8-ны өдрийг хүртэл хойшлуулах шийдвэрийг гаргасан. Харин уг шүүх хурал дахин хойшилсон талаар тус улсын хэвлэлүүд бичжээ.
Энэ талаар шүүгч хэлэхдээ: ‘Шалгалтын явцад хохирогч эмэгтэйчүүд хууль бус оршин суугч байсан нь тогтоогдсон. Гэвч энэ нь тухайн цагдаагийн албан хаагчийн хүчингийн хэргийг хөнгөлөх шалтгаан болохгүй. Хазрул Хизамыг хүний наймаатай холбоотой хэрэг үйлдсэн, бэлгийн мөлжлөг үйлдсэн гэсэн үндэслэлээр шүүж буй. Хэрэв буруутай гэдэг нь нотлогдвол Эрүүгийн хуулийн 354-р зүйлд зааснаар 10 жилийн хорих ял онооно’ хэмээжээ.
Одоогоор шүүх хурал ямар шалтгааны улмаас хойшилсон нь тодорхойгүй байгаа бөгөөд Малайзын талаас тус хэрэгт хатуу арга хэмжээ авна гэдгээ илэрхийлсэн юм.
Эх сурвалж: Malaymail.com
