Испанийн Барселона клубийн алдарт тоглогч Лионел Месси багаа орхих хүсэлтэй байгаагаа албан ёсоор мэдэгджээ. Тэрээр клубд хандан гэрээг дуусгавар болгож үнэгүй явах боломжийг олгохыг хүссэн бичиг илгээсэн байна.
Клубийн мэдээлснээр уг бичиг түүний хуульчаас факсаар ирсэн бөгөөд албан ёсоор хариу өгөөгүй байгаа аж. Мессигийн гэрээнд улирлын төгсгөлд өөрийнх нь хүсэлтээр явуулах тухай заалт байсан ба уг заалт нь Аваргуудын лигийн финалаас хойш 10 хоногийн дотор хэрэгжих юм.
Гэвч Барселона клубээс уг заалтын хугацаа Аваргуудын лигийн финалын анх зарлагдсан тов буюу тавдугаар сарын 30-аас зургаадугаар сарын 10 хүртэл үргэлжлээд дууссан гэж үзэж байна. Харин Мессигийн хуульч цар тахлын улмаас Аваргуудын лигийн финалын дахин зарлагдсан тов буюу наймдугаар сарын 23-наас есдүгээр сарын 3 хүртэл үргэлжилнэ хэмээн маргаж байгаа юм.
Энэ жил Мессигийн хувьд 2007-2008 оны улирлаас хойш цомгүй өнгөрөөсөн анхны жил бөгөөд Аваргуудын лигийн хасагдах шатанд Байерн Мюнхен клубд 2-8 харьцаагаар хожигдсон нь хүнд цохилт болсон гэж мэргэжилтнүүд үзэж байна.
Мессиг явах болсонд Барселона клубийн домогт тоглогч, хуучин багийн анд, ахлагч Карлес Пуёл “Шийдвэрийг чинь хүндэлж байна. Лео. Би чамайг дэмжиж байгаа шүү” хэмээжээ.
Харин Барселона клубийн шинэхэн дасгалжуулагч Рональд Кумен “Мэдээж Месси бол дэлхийн шилдэг тоглогч. Хэн дэлхийн шилдэг тоглогчийг өөрийнх нь эсрэг тоглоосой гэж хүсэх вэ. Дасгалжуулагчийн хувьд би түүнтэй хамтран ажиллаж, ялалт байгуулахыг хүсэж байна. Тэр одоо ч Барселонагийн тоглогч хэвээр. Манай багт харьж яваа тоглогч олон байгаа ба бид шийдвэр гаргах хэрэгтэй болсон ч Мессиг үлдэнэ гэж найдаж байна” гэсэн юм.
Өдгөө 33 настай Аргентин довтлогч хэрэв багаасаа явбал түүнийг авах сонирхолтой ПСЖ, Манчестер Сити, Интер Милан клубүүд байгаан дээр Хятад, Америкийн лиг рүү явах эсвэл унаган клуб Newell’s Old Boys-д очиж болох юм.
Эх сурвалж: SkySports, Transfermarkt
