Сонгинохайрхан дүүргийн 32 дугаар хороо Эмээлт дэх мал нядалгааны газруудаас гардаг малын гаралтай хаягдал /сэв, цус, өөх тос, арьс мах гэх мэт/, 21 дүгээр хорооны мал бүхий айл өрхөөс үүсэх малын өтөг бууцны хаягдлыг цуглуулж дахин боловсруулан бордоо хийх үйлдвэр байгуулахаар Улаанбаатар хотын Ерөнхий менежер Т.Гантөмөр “МСРТ” ХХК, “Эко тайхи” ХХК, “Усанболор хангай” ХХК-уудтай хамтран ажиллах гэрээг 2020 оны 8-р сарын 24-ны өдөр байгууллаа.
НЗД-ын 2020 оны А/500 дугаар захирамжаар Сонгинохайрхан дүүргийн 21-р хорооны Барын аманд малын гаралтай хог хаягдлыг дахин боловсруулах үйлдвэр, аж ахуй байгуулах зориуулалтаар 5 га газрыг Улаанбаатар хотын Захирагчийн ажлын албанд эзэмшүүлэхээр шийдвэрлэсэн. Энэхүү 5 га газарт дээрх бордооны үйлдвэр, аж ахуй байгуулах төслийг хэрэгжүүлэх юм. Энэхүү үйлдвэр байгуулагдсанаар малын гаралтай хаягдал ил задгай хаягдах байдал бүрэн зогсож, малын гаралтай хаягдлаас байгаль орчин, хүний эрүүл мэндэд үзүүлэх сөргөөр нөлөөлөл буурна гэж үзэж байна.
Төсөл хэрэгжүүлэгч компаниуд 2020 оны 9, 10 дугаар саруудад хог хүлээн авах талбайгаа бэлтгэх бөгөөд ирэх 11 дүгээр сараас Сонгинохайрхан дүүргийн 21, 32 дугаар хорооноос үүсэх малын гаралтай хог хаягдлыг хүлээн авч эхлэхээр төлөвлөөд байна.
Өмнө малын гаралтай хог хаягдал Эмээлтэд ил задгай хаягдаж, махчин шувууд ихээр цуглан нисэх онгоцны нисэх буух зурваст сөрөг нөлөө үзүүлдэг байсан бөгөөд 2017 оноос эхлэн Улаанбаатар хотын Захирагчийн ажлын албанаас хэд хэдэн удаагийн зохион байгуулалтын арга хэмжээ авч, цэвэрлэгээний ажлыг зохион байгуулан мал нядалгааны газруудыг зохион байгуулалтад оруулсны үр дүнд дахин хог хаягдал үүсдэггүй болсон байна.
